Kurti: Gjaku i dëshmorëve është në themelet e Republikës

“Gjaku i dëshmorëve është në themelet e Republikës,” tha Kryeministri Kosovës, Albin Kurti, pas homazheve në përvjetorin e 26-të të masakrës në Tërnje të Therandës teksa vuri në dukje se ka ngelur një pjesë më e vogël e punës

“Por, e rëndësishme është që ta forcojmë shtetin tonë, ta forcojmë shtëpinë e popullit, ashtu që brezave të ardhshëm kurrë të mos iu bie që të vuajnë, të kenë dhembje apo humbje çfarë kaluam ne,” tha Albin Kurti duke shtuar se 26 vjet më parë në pranverën e vitit ’99-të, u vranë martirët e dëshmorët e kombit, që na e kujton se sa i madh ishte çmimi i lirisë.

Me këtë rast, Kryeministri i Kosovës shprehu respekt të veçantë për nënat shqiptare, të cilat i rritën bijat edhe bijtë e tyre për të qenë qytetarë të dinjitetshëm të Republikës.

“Përkulemi me nderim dhe mirënjohje të thellë, e falënderim të përzemërt për të gjithë ata, të cilët kontribuan për lirinë e popullit tonë dhe vendit tonë.”

Në homazhe, Kryeministri i Kosovës, Albin Kurti, ishte i shoqëruar nga deputetët Artan Abrashi, Haxhi Avdyli, Albena Reshitaj, si dhe familjarë të dëshmorëve e martirëve të kombit, veteranë e invalidë të Ushtrisë Çlirimtare të Kosovës. 

Sot, Kryeministri Kurti, së bashku me Kryetarin e Komunës Rahovec, Smajl Latifi, dhe bashkëpunëtorë, bënë homazhe edhe në varrezat në Celinë.

Ndryshe, më 25 mars të vitit 1999, forcat gjenocidale të Serbisë, kryen masakra të përgjakshme në fshatrat e Rahovecit, në të cilat vranë 75 civilë në Celinë, 69 në Fortesë, 49 në Brestoc.

26 vjet më parë, nga 25 deri më 27 mars 1999, në fshatrat Fortesë, Brestoc, Celinë  dhe Krushë  e Madhe të Rahovecit nga forcat serbe janë masakruar 243 persona, ndërsa 893 shtëpi u dogjën.