Kurti i kërkon SHBA-së ndihmë për planet luftarake të Serbisë

Kryeministri i Kosovës, Albin Kurti, i ka kërkuar Shteteve të Bashkuara të rrisë ndihmën, për siç tha, planet luftarake të Serbisë.

Ai falënderoi Washingtonin për mbështetjen e ofruar ndaj Kosovës pas sulmit ndaj Policisë në Banjskë, ku mbeti i vrarë rreshteri Afrim Bunjaku.

Kurti në një bisedë me Këshilltarin për Siguri Kombëtare të Shtëpisë së Bardhë, Jake Sullivan, tha se “e sigurova atë për vazhdimin e bashkëpunimit mes Policisë së Kosovës dhe KFOR-it”.

“Zotimi ynë për të mbrojtur të gjithë qytetarët mbetet i palëkundur,” u shpreh Kurti përmes rrjetit social X.

SHBA-ja ka dënuar fuqishëm sulmin ndaj Policisë së Kosovës, që Prishtina e cilëson terrorist.

Shtëpia e Bardhë i bëri sot thirrje Serbisë të tërheqë trupat ushtarake të dislokuara përgjat kufirit me Kosovën, duke e cilësuar si zhvillim “shumë destabilizues”.

Kosova tha se mbi 80 sulmues të maskuar dhe armatosur kanë sulmuar Policinë në Banjskë më 24 shtator.

Gjatë përleshjeve të grupit të armatosur me Policinë në manastirin e Banjskës, kanë mbetur të vrarë edhe tre sulmues.

Kosova ka kërkuar një hetim ndërkombëtar për Serbinë, lidhur me rolin e saj në këtë sulm.
Serbia ka mohuar çdo përfshirje.

Ndërkohë, sot, Milan Radoiçiç, tha se po jep dorëheqje nga Lista Srpska – partia kryesore e serbëve në Kosovë që gëzon mbështetjen e Beogradit – përmes avokatit të tij e pranoi se ka organizuar dhe ka marrë pjesë në sulmin në Banjskë.

Më herët, autoritetet në Kosovë kanë publikuar dëshmi, sikurse një video të incizuar me dron, ku shihej Radoiçiqi i armatosur dhe i veshur me uniformë në Banjskë./RFE/