Kurti: Ka politikan në Beograd dhe Prishtinë që duan konflikt në veri!

Kryeministri në detyrë, Albin Kurti, sqaroi se ishte Ministria e Shëndetësisë ajo që ka vendosur që Komuna e Mitrovicës Veriore dhe ajo e Zveçanit të jenë në karantinë, por ka politikanë në Beograd dhe Prishtinë që duan konflikt në veri të vendit

“Karantinën në Mitrovicë dhe Zveçan nuk deshëm ta bëjmë me zë me tupan, në mënyrë që krizën shëndetësore të mos e thellojmë edhe me një tjetër,” tha Albin Kurti përmes një mesazhi në rrjetin social Facebook ndërsa atyre që u dështoi projekti i shkëmbimit të territoreve tashmë duan konflikte.

“Ka politikan e zyrtarë të lartë në Beograd që duan konflikt në Kosovë, sidomos në veri të Ibrit. Mirëpo ka politikanë e zyrtarë të lartë edhe në Prishtinë që duan konflikt në Kosovë, sidomos në veri të Ibrit”.

“Ata duan të provojnë tensione sepse duan incidente. Projekti i tyre i shkëmbimit territorial sikur të realizohej do të shkaktonte konflikte e gjakderdhje të reja. Ai projekt dështoi. Tash duan konflikte e gjakderdhje në terren për t’u rikthyer te shkëmbimi territorial, përkatësisht te ndarja e Kosovës. Krejt njëjtë është edhe ajo intenca për të shpallur gjendje të jashtëzakonshme me çdo kusht e çmim. Pasi që nuk arritën ta shpallin për ta bërë, duan ta bëjnë që ta shpallin”, ka thënë Kurti.