Kryeministri Kurti: Kryetar në veri bëhesh vetëm me zgjedhje të Republikës së Kosovës

Kryeministri Albin Kurti, pas përurimit të zyrës së re të Administratës Tatimore në Mitrovicën e Veriut, tha se institucionet e Kosovës funksionojnë në shërbim të të gjithë qytetarëve pa dallim.

“Ne punojmë për të gjithë qytetarët dhe unë nuk jam mbi ligjin. Koha para qeverisë sonë nuk ka qenë normale. Nuk them se tani është gjithçka normale, por sigurisht se gjithçka po normalizohet. Kjo sepse ligji nuk është ai që e ndan shoqërinë në ata që nuk janë të mbrojtur dhe në ata që askush nuk guxon t’i prek. Ai në fakt bashkon shoqërinë me barazi dhe drejtësi të barabartë për të gjithë.

Nuk mund ta jepni asnjë shembull ku organet e pushtetit: policia e Kosovës, e tani edhe Administrata Tatimore nuk u shërben të gjithëve njëjtë dhe profesionalisht,” tha Albin Kurti ndërsa i pyetur nga gazetarët nëse e ka vizituar Kryetarin e Komunës Mitrovicë Veri, Milan Radojeviç, ai tha se ende nuk e ka bërë një gjë të tillë, por me rëndësi është të kuptohet se në komunat në veri mund të bëhesh Kryetar vetëm përmes zgjedhjeve në Republikën e Kosovës.

“Ka qenë një transferim paqësor i pushtetit. Pra, do të thotë se në komunat në veri të Ibrit mund të bëhesh kryetar komune, mund të bëhesh asamblist, mund të bëhesh drejtor, por vetëm nëpërmjet zgjedhjeve në Republikën e Kosovës.”  

Ndryshe, Kryeministri i Kosovës, Albin Kurti, gjatë qëndrimit në pjesën veriore të Mitrovicës së bashku me Kryetarin e Komunës Mitrovicë Jug dhe ministrat Elbert Krasniqi e Xhelal Sveçla, kanë vizituar familjen Haradinaj, në një nga ndërtesat e “Tre Rrokaqiejëve”, ku njëri nga anëtarët e kësaj familje kishte humbur jetën më 8 prill 2012 nga një shpërthim bombe në apartamentin e tij.

Më pas, Kryeministri Kurti mori pjesë edhe në përurimin e Zyrës së re të Administratës Tatimore të Kosovës në Mitrovicën e Veriut, objekt në të cili deri para pak kohësh funksiononin struktura paralele serbe.