Kurti-Leibovich, tërheqje të investimeve izraelite në Kosovë

Tërheqja e investimeve izraelite në Kosovë, ishte çështja kryesore e diskutimit të Kryeministrit të Kosovës, Albin Kurti, në takimin që zhvilloi me udhëheqësen e Komitetit Amerikano-Hebraik, Avital Leibovich, ku dhe e informoi me planet dhe programin qeveritar, që janë të përqëndruara në punësim dhe në drejtësi.

Ish-nënkolonelja e forcave rezervë të shtetit të Izraelit duke uruar Kryeministrin Kurti për fitoren mbresëlënëse në zgjedhjet e përgjithshme të 14 shkurtit, si ndryshimi i shumëkërkuar nga qytetarët, tha se për zhvillim ekonomik dhe tërheqje të investimeve nevojitet mërgatë e konsoliduar dhe e bashkuar.

Ajo premtoi angazhim për të lobuar te kompani të ndryshme izraelite, që do të mund të orientonin investimet e tyre në Kosovë.   

Avital Leibovich viziton Prishtinën pas Tiranës ku dhe u nderua nga Presidenti i Republikës me medaljen “Kalorës i Urdhrit të Skënderbeut” për kontributin në sigurinë, zhvillimin dhe përparimin e  Shqipërisë.