Kurti: Numri i të infektuarve me koronavirus e ka kaluar numrin e të shëruarve

Kryeministri në detyrë i Kosovës, Albin Kurti, tha sot se është rritur numri i personave të infektuar në krahasim me ata që janë shëruar nga koronavirusi i ri. Këto komente Albin Kurti i bëri pas një vizite në Klinikën Infektive të Qendrës Klinike Universitare të Kosovës, ku po trajtohen 11 pacientë të prekur me COVID-19, që shkakton koronavirusi.

“Kemi diçka brengosëse që duhet ta adresojmë për shkak se numri i të infektuarve e ka kaluar numrin e të shëruarve. Lakorja që është në rënie të vazhdueshme ngelet e tillë përveç këto dy ditët e fundit, andaj duam që ta fuqizojmë mesazhin tonë dhe gjithashtu t’i mirëmbajmë fuqishëm masat edhe udhëzimet ashtu që të mos kemi ndonjë dështim të minutave të fundit,” tha Kryemnistri Albin Kurti pas vizitës në Klinikën Infektive ku ishte i shoqëruar nga ministri i Shëndetësisë, Arben Vitia, dhe Drejtori i Qendrës Klinike Universitare të Kosovës, Basri Sejdiu.

Ndryshe, sipas të dhënave të fundit, RFE raporton se në Kosovë janë regjistruar 927 raste me koronavirus; 671 persona janë shëruar dhe 29 pacientë kanë vdekur.

Në Kosovë rastet e para me koronavirusin e ri u shfaqën më 13 mars.

Për të frenuar përhapjen e mëtejmë të virusit, autoritetet kanë shpallur gjendje emergjente të shëndetit publik.