Paris, Kurti: Po jetojmë në një kohë kur Evropa është thellësisht e sfiduar
“Po jetojmë në një kohë kur Evropa është e begatë, dhe në të njëjtën kohë thellësisht e sfiduar,” tha kryeministri në detyrë i Kosovës, Albin Kurti, gjatë diskutimit mbi situatën gjeopolitike në Evropë dhe ndikimi në Ballkanin Perëndimor, organizuar nga Instituti francez, “Jacques Delors”, duke shtuar se aftësia jonë për të planifikuar në terme afatgjate vazhdimisht po vihet në hije nga realitete të menjëhershme gjeopolitike.
“Për dekada, jemi udhëhequr nga dëshira për homeostazë, por ky më nuk është realiteti ynë. Sistemet që lulëzojnë, qofshin ato institucione, organizata apo shoqëri, evoluojnë përmes cikleve të rendit, çrregullimit dhe rirregullimit, dhe për Evropën, ky ekuilibër i ri kërkon një qëndrim të qartë kundër autoritarizmit dhe përfshirje e qartë e atyre vendeve që mbështesin demokracinë,” tha Kryeministri në detyrë në Paris duke theksuar se Kosova ka zhvilluar institucione të forta demokratike.
“Që prej shpalljes së pavarësisë në vitin 2008 me mbështetjen ndërkombëtare, vendi ynë ka zhvilluar institucione të forta demokratike, ndërkaq gjatë këtij mandati qeveritar, Kosova ka luftuar korrupsionin dhe ka shënuar rritje të qëndrueshme ekonomike,” tha Kurdit duke veçuar:
“Në muajin korrik të këtij viti, Fondi Ndërkombëtar Monetar dhe Banka Botërore hoqën zyrtarisht Kosovën nga lista e vendeve të brishta dhe të prekura nga konflikti, duke u bazuar në përparimin institucional dhe ekonomik të vendit siç reflektohen edhe në rënien e ndjeshme të papunësisë nga afër 26 për qind në më pak se 11 për qind,”
Me këtë rast, Albin Kurti foli edhe për politikat sociale.
“Nga bërja e arsimit të lartë publik falas dhe ndarja e shtesave për lehona e fëmijë, te skemat e punësimit të të rinjve dhe pensione më të larta, teksa Kosova po përgatitet që të mirëpres Lojërat Mesdhetare 2030 në kuadër të së cilave po bëhen e do të bëhen investimet më të mëdha në infrastrukturën sportive. Sa i përket kësaj të fundit, falënderoi Agjencinë franceze për Zhvillim, AFD, dhe përfaqësuesit e saj që ishin aty të pranishëm për mbështetjen dhe bashkëpunimin me institucionet e vendit tonë,” tha Kryeministri në detyrë i Kosovës ndërkohë duke folur për sigurinë dhe mbrojtjen, theksoi rritjen e buxhetit për FSK-në ndërsa përfundoi:
“Qeveria që unë drejtoj i ka dhënë mbrojtjes përmes rritjes së buxhetit dhe ngritjes së kapaciteteve të Forcës së Sigurisë së Kosovës në bashkëpunimin me partnerët tanë ndërkombëtarë. Mbrojtja e demokracisë është e pandashme dhe e pandalshme.”
Ndryshe, në tryezën e organizuar nga Instituti francez, “Jacques Delors”, u diskutua edhe për mbrojtjen, të drejtat e njeriut, përfshirë ato të pakicave, si dhe zhvillimet e fundit në vend, aty ku i pranishëm ishte edhe i Dërguari i Posaçëm i Ministrisë së Punëve të Jashtme të Francës për Ballkanin Perëndimor, Rene Troccaz.
