Kurti: Prilli, vendimtar në luftën kundër COVID-19
Kryeministri në detyrë i Kosovës, Albin Kurti mëngjesin e së martës e ka nisur ditën në komunën e Gjilanit, ku bashkë me ministrin e Shëndetësisë, Arben Vitia dhe ministren e Administrimit të Pushtetit Lokal, Emilja Rexhepi u priten nga kryetari, Lutfi Haziri në Shtabin Emergjent të Gjilanit. Aty u njoftuan nga afër për gjendjen dhe masat e ndërmarra nga komuna në parandalimin e pandemisë Codiv-19.
Kryeministri në detyrë, Albin Kurti, tha se muaji prill është vendimtar për të dalë nga kriza shëndetësore pandemike.
Ai theksoi gatishmërinë dhe vullnetin për të shtyrë në kohë sa më shumë lakoren e shpërndarjes së Covid-19.
“Jemi të gatshëm, të interesuar të vullnetshëm që këtë lakoren e shpërndarjes së Covid 19 të shtyjmë sa më shumë në kohë. Ngritjen e saj të bëjmë sa më të pakët në mënyrë që të parandalojmë këtë pandemi që iu mori jetën tre qytetarëve. Organizimi ynë, edhe qendror, edhe lokal, është shembullor dhe këtë po e thonë edhe të tjerët. Duhet të vazhdojmë edhe në muajin prill. Sepse muaji prill është muaj vendimtar që nga kjo krizë shëndetësore të dalin sa më shpejt dhe sa më pak dëme”, tha ai.
Ndërsa, kryetari i komunës së Gjilanit, Lutfi Haziri tha se falë koordinimit ndërinstitucional kanë arritur të menaxhojnë rastet në komunën që ai drejton.
Derisa u shpreh se i ka paraqitur gjitha kërkesat e komunës, kryeministrit në detyrë, Kurti.
“Në 15 rastet që i kemi menaxhuar deri tash tre i kemi të shëruar, e n joftova kryeministrin. Tendenca është në rënie e kemi lokalizuar dhe po e menaxhojmë këtë infeksion në vendet ku është gjetur deri tash… Problemet shtesë veçse i nënvizova. E njoftova kryeministrin se Gjilani e ka një problem prej qershori të vitit të kaluar për thatësinë e ujit. Jemi që 10 muaj me problemin e furnizimit me ujë. Në kushtet ku kërkohet higjienë qytetarët e Gjilanit e kanë një problem”, tha ai.
Mbi kërkesat e të parit të Gjilanit, kryeministri në detyrë, theksoi se ka mbajtur të gjitha shënimet.
“Unë edhe kam dëgjuar me kujdes dhe kam mbajtur shënime”, tha ai.
Kryeministri Kurti mes tjerash në Gjilan foli edhe për masat e kufizimit të lëvizjes, derisa bëri të ditur se sot gjatë mbledhjes së qever isë pritet te merret një vendim i ri për kufizimin e lëvizjes.
“Lidhur me atë se si do të vazhdohet me masat në vijim. Në mënyrë që të kemi kufizimin e lëvizjes. Sepse lëvizja e njerëzve potencialisht është lëvizje e virusit. Por në anën tjetër të krijojmë hapësirë për bizneset tona”, tha ai.
Kurti: Të izolohemi e vetëmbrohemi, mos ta sjellim punën te respiratorët
Pas Gjilanit, Kryeministri në detyrë i Kosovës, Albin Kurti vizitoi komunën e Kamenicës ku deklaroi se janë duke bërë përpjekjet maksimale për të parandaluar pandeminë Covid 19.
“Po të bëjmë përpjekjet maksimale për parandalim të suksesshëm. Ne e dimë që sektori ynë i shëndetësisë publike nuk është në nivel të kënaqshëm, andaj energjitë tona janë të përkushtuara në parandalim. Po rritet edhe numri i respiratorëve që po marrim si donacion. Por le të mos e sjellim punën tek respiratorët, le të punojmë në parandalim duke u vetizoluaur dhe kufizuar lëvizjet tona”, tha ai.
Ndërsa, kryetari i komunës së Kamenicës, Qëndron Kastrati po konsideron se gjendja në këtë fazë në komunën që ai drejton në kontrolluar.
“Ditët në vazhdim njëra prej sfidave është relaksimi i qytetarëve. Kështu që bashkërisht po kërkojnë që kujdesi mos të bije dhe qytetarët mos të relaksohen…aktualisht i kemi 161 persona që duhet të qëndrojnë në vetëizolim për momentin në këtë fazë po e konsiderojmë se është e izoluar dhe është në kontroll”, tha ai.
