Kurti: Qeveria do jetë më aktive në mbështetjen e shqiptarëve në Luginë

Kryetari i Lëvizjes Vetëvendosje dhe Kryeministri i ardhshëm i Kosovës, Albin Kurti, në një takim me delegacionin e Partisë Demokratike nga Lugina e Preshevës të kryesuar nga kryetari i saj, Nagip Arifi, kryetarja e Forumit të Gruas, Adelina Brucaj Hasani, kryetari i Forumit Rinor, Sali Salihi dhe Shaban Xheladini duke folur për prioritetet e qeverisë së re, tha se vend të rëndësishëm ka mirëqenia e shqiptarëve jashtë kufirit, të drejtat dhe liritë e tyre si dhe aspekti i shëndetësisë dhe arsimit në ato vende ku ata jetojnë.

Albin Kurti o zotua se qeveria e Kosovës do jetë më aktive në mbështetjen e shqiptarëve në Luginë, dhe këtë do e bëjë bashkë me Shqipërinë, si përmes zbatimit të marrëveshjeve të deritashme ashtu edhe me marrëveshje të reja për politika që mundësojnë zhvillimin e jetës atje.

Përfaqësuesit nga Bujanoci mes tjerash e informuan Albin Kurtin për gjendjen e rëndë në Bujanoc, ku për shkak të ngecjes në ekonomi dhe arsim, të rinjtë nuk po shohin më perspektivë atje dhe po emigrojnë jashtë vendi siç kanë bërë më herët në Medvegjë.

Ndryshe, Kryetari i Lëvizjes Vetëvendosje, Albin Kurti, në takim ishte i shoqëruar nga anëtarja e Kryesisë, Albulena Haxhiu, Sekretari për Marrëdhënie me Jashtë, Kreshnik Ahmeti dhe Teuta Fazliu.