Kurti: S’ka obligim kushtetues ta kemi Listën Srpska në Qeveri!

Lideri i Lëvizjes Vetëvendosje, Albin Kurti, i ka dhënë fund debatit i cili së fundi u ngrit me përfundimin e numërimit lidhur me praninë serbe në qeveri, duke theksuar se nuk është obligim kushtetues që Lista Srpska të jetë në qeveri, por ministër serb do të ketë.

“Nuk ka obligim kushtetues që ta kemi në koalicion Listën Srpska, por jemi të vetëdijshëm që duhet ta kemi së paku një ministër nga komuniteti serb dhe obligimin kushtetues do ta përmbushim, veçse koalicioni qeveritar nuk do të jetë kurrsesi i varur nga shnatazhet e cilitdo krah e cilësdo ngjyrë, se lëre më të cilësdo etni,” tha Albin Kurti për televizionin publik të Kosovës ndërsa për bisedimet me LDK-në për koalicionin u shpreh:

“Jemi gjithnjë e më afër, larg nuk kemi qenë asnjëherë. Grupet tona punuese janë duke diskutuar për harmonizimin programor dhe projektet e përbashkëta qeveritare që do i kemi, por njëkohësisht edhe për ndarjen e përgjegjësive, funksioneve në qeverisjen tonë të përbashkët. Populli e ka vendosur që opozita e deridjeshme do të jetë qeveria e nesërme dhe njëkohësisht ia ka dhënë një përparësi Lëvizjes Vetëvendosje dhe mua për këtë qeveri.”

Synimi ynë, tha Albin Kurti, është që qeveria jonë të jetë një koalicion sa më i madh me numra.

“Por natyrisht që hapi i parë dhe më i rëndësishëm është ai i marrëveshjes mes Lëvizjes Vetëvendosje dhe LDK-së dhe vetëm më pas ne do të vendosim sërish bashkë se çka më tutje, por një pjesë të madhe të punës tashmë e ka kryer populli i Kosovës. Ne nuk do ta kemi qeverinë të varur nga kushdo që përpiqet që të faktorizohet për vete, duke penguar qeverisjen”