Kurti takim me Ambasadorin turk, reflektim mbi bashkëpunimin në ekonomi dhe mbrojtje

Reflektimi mbi bashkëpunimin gjatë vitit 2023 në fushën e mbrojtjes, sigurisë dhe ekonomisë, ishin pjesë e takimit të Kryeministritë Kosovës, Albin Kurti, me Ambasadorin e Turqisë, Sabri Tunç Angılı ku u diskutua edhe për planet e partneritetit ndërmjet dy shteteve për vitin 2024.

“Me urimet e dyanshme për Vitin e Ri 2024, takimin e parë për këtë vit, kryeministri Kurti dhe ambasadori Angılı e filluan duke reflektuar mbi bashkëpunimin përgjatë vitit 2023, sidomos në fushën e mbrojtjes, sigurisë dhe ekonomisë, dhe e vazhduan me planet dhe synimet e partneritetit ndërmjet dy shteteve për vitin në të cilin sapo kemi hyrë,” thuhet në njoftimin e Zyrës së Kryeministrit të Kosovës duke shtuar se Ambasadori Angılı e uroi Kryeministrin dhe popullin e Kosovës për liberalizimin e vizave që hyri në fuqi me 1 janar. 

Me këtë rast, Kryeministri Albin Kurti e falënderoi për urimin dhe shprehu mirënjohjen e tij për mbështetjen e vazhdueshme të Turqisë ndaj shtetit dhe popullit të Kosovës, dhe gatishmërinë e vullnetin për thellim dhe zgjerim të mëtejmë të marrëdhënieve dypalëshe Kosovë-Turqi.