Kurz: Nëse Prishtina dhe Beogradi arrijnë marrëveshje, ne e mbështesim

Kancelari austriak, Sebastian Kurz, tha sot në Prishtinë se Vjena e mbështetë cilëndo marrëveshje të paqes që arrihet në dialogun ndërmjet Prishtinës dhe Beogradit, duke mos përjashtuar as opsionet për ndryshimin e kufijve. Këto komente, ai i bëri në Prishtinë gjatë një konference të përbashkët me presidentin e Kosovës, Hashim Thaçi, raporton RFE.

“Vetëm një marrëveshje paqeje mes dy vendeve do të mund t’i hapte rrugë anëtarësimit të tyre në Bashkimin Evropian”, tha Kurz.

“Qeveria e Austrisë pajtohet me cilën do marrëveshje e cila merret ndërmjet Prishtinës dhe Beogradit, pra ne jemi të bindur që nëse ia dalin të kenë marrëveshja askush nuk do të jetë kundër asaj, edhe nëse është korrigjimi i kufijve dhe shkëmbimi i territoreve ajo do të mbështetet nga ne” ka thënë Kurz.

Kancelari austriak, vendi të cilin kryeson në Bashkimin Evropian, potencoi se nuk do të ketë stabilitet në rajon dhe as perspektivë evropiane pa një marrëveshje paqeje mes Kosovës dhe Serbisë përderisa shprehu besimin e tij për përpjekjet dhe angazhimin që po bëhet në arritjen e saj.

Përderisa Kurz foli me tone pozitive për dialogun mes Prishtinës dhe Beogradit, ai nuk e fshehu skepticizmin e tij për krijimin e ushtrisë së Kosovës dhe liberalizimit të vizave.

“Sa i përket idesë së ushtrisë së Kosovës jemi shumë skeptik. Rajonit i duhen masa që çojnë në stabilitet dhe jo në destabilitet”, tha Kurz.

Kurse në lidhje me liberalizimin e vizave për qytetarët e Kosovës, Kurz tha se ende ka shumë vende anëtare të Bashkimit Evropian që janë skeptike në këtë proces.

Ndërkohë, presidenti i Kosovës Hashim Thaçi tha se dialogu me Serbinë duhet të vazhdojë deri në arritjen e një marrëveshje gjithëpërfshirëse e cila, sipas tij, do të sillte njohje reciproke dhe anëtarësimin e Kosovës në Kombet e Bashkuara. “Marrëveshja Kosovë-Serbi do të sjellë paqe në Ballkanin Perëndimor dhe do të hap perspektivën e anëtarësimit të këtyre vendeve në Bashkimin Evropian” tha Thaçi.

Pas takimit me presidentin Thaçi, kancelari Kurz zhvilloi një takim edhe me kryeministrin e Kosovës, Ramush Haradinaj.

Vizita e kancelarit austriak në Kosovë bëhet një ditë pasi ai qëndroi në Beograd ku ia bëri të qartë Serbisë se e vetmja mundësi e anëtarësimit të saj në Bashkimin Evropian do të ishte e mundur pasi të arrijë një marrëveshje me Kosovën.