Kush është më shkja, Edi Rama apo Ilir Meta!

nga Agim Popoci

Pasi thirrjes së Lëvizjes Vetëvendosje që të pritet me protestë ardhja e dy kriminelëve serbë, Presidentit të Serbisë, Aleksandar Vuçiç dhe kryesuesit të radhës së Presidencës së Bosnje Hercegovinës, Milorad Dodik, të cilët më 8 Maj do të marrin pjesë në Samitin e radhës së Liderëve të Procesit Brdo-Brijuni në Tiranë, shpërtheu një fushatë denigruese e hyzmeqarëve të Ilir Metës kundër idesë, qëllimit dhe organizatorëve të protestës, si dhe me akuza pse kjo protestë  nuk mbahet në Prishtinë dhe pse jo kundër Edi Ramës!

Ilir Meta mund të jetë shqetësuar pse do të mbahet protesta kundër dy të ftuarëve  të tij në Samit, por çdo shqiptar normal e ka detyrim të protestoj kundër kriminelëve serbë pavarësisht se ku mbahet Samiti në Prishtinë ose Tiranë.

Por nëse Ilir Meta nuk është dakord me protestat kundër liderëve serbë, nuk ka pse e fut në këtë histori Edi Ramën, kur ai nuk ka lidhje as me Samitin dhe as me organizimin e tij.

Sa për Presidentin e Serbisë, po, mund të kenë konkurrencë se cili është më shkja se tjetri, Rama apo Meta, nëse kemi parasysh të kaluarën e tyre ideologjike, partisë nga vijnë dhe të kaluarën e afërt politike.

Po kush është më shkja, Edi Rama apo Ilir Meta?! Edi Rama gjithmonë është akuzuar se nuk ka shok, nuk ka besë, fe e atdhe. Ndoshta edhe nuk i ka, ama Serbinë e ka në zemër. Baton Haxhiu si këshilltar mund ta ketë ndihmuar në përafrimin me Aleksandar Vuçiçin por gjithsesi ata janë një ndërmarrje, selia e tyre është në Beograd.

Kur Aleksandar Vuçiç erdhi në Tiranë me ftesë të Edi Ramës, pas “vizitës historike në Beograd”, ky fakt nuk e bëri më pak shkja Ilir Metën, sepse që të dy, si Edi Rama Kryeministër ashtu edhe Ilir Meta Kryetar i Parlamentit e më pas edhe President, janë në postet aktuale shtetërore vetëm me ndërhyrjen e Beogradit zyrtar apo më saktë Presidentit të Serbisë, që në atë kohë ishte Boris Tadiç.

Edi Rama nuk e ka dashur Kosovën edhe në kohën kur nuk ishte Kryeministër me urdhër të Beogradit, dhe kur ai nuk kishte lidhje me ndarjen e Kosovës. Por në këtë kohë ishte Ilir Meta Kryeministër i cili jo me Aleksandar Vuçiçin por me Zoran Gjingjiçin kryeministër po bisedonin për ndarjen e Kosovës.

Si Zoran Gjingjiçi dje ashtu dhe Aleksandar Vuçiçi sot, e kishin të qartë se Kosova më nuk mund të kthehet nën kontrollin e Serbisë dhe përpjekjet e tyre konsistonin të shpëtonin aq sa kishin mundësi nga një tokë të cilën e kishin humbur me luftë; Dhe, këtu Gjingjiç dhe Vuçiç dallojnë nga Ilir Meta dhe Edi Rama! Meta dhe Rama, përveç se nuk e duan ishin dhe janë të gatshëm për të bërë pazare, dhe, pse jo për ta shitur tokën e Kosovës. Madje kur është në pyetje Serbia edhe për ta falur!

Sot, Edi Rama dhe Ilir Meta nuk dallojnë fare, si për dashurinë ndaj Serbisë ashtu edhe urrejtjen ndaj Kosovës. Vetëm një detaj, jo i papërfillshëm i dallon sot, kur të gjitha përpjekjet e Aleksandar Vuçiçit për ta ndarë Kosovën dështuan, dhe asin nën mëngë e ka Ilir Meta.

Nëse Presidenti i Serbisë, Aleksandar Vuçiç, siç paralajmëroi në prag të këtij Samiti në Tiranë, do të përdorë edhe kartën e fundit pas dështimit të përpjekjeve përmes SHBA, BE dhe kancelares Merkel, kjo kartë është Ilir Meta edhe pse ai nuk e identifikoi. Presidenti i Shqipërisë, Ilir Meta, ndoshta e ka sot të vështirë të ndikoj në ndarjen e Kosovës por si miku i vetëm i shtrenjtë i kryeministrit të Kosovës, Ramush Haradinaj në Tiranë, mund t’i bëjë nderin e madh por jo të fundit, Serbisë dhe presidentit të saj Aleksandar Vuçiç.

Urojmë që të mos ndodhë, por edhe nëse ndodhë që kryeministri i Kosovës, Ramush Haradinaj në ditët në vijim do të pezulloj taksën ndaj produkteve serbe për hatër të miqësisë së vjetër dhe të shtrenjtë me Ilir Metën, as kjo nuk e bënë më shumë serb Metën se sa Edi Ramën.

Anulimi i Konferencës së Bujanit, me vendimet e së cilës populli i Kosovës kishte të drejtën për vetëvendosje nëse dëshiron ti bashkohet ose jo Shqipërisë pas luftës së dytë botërore, ishte fillimi i mihjes së varrit të Kosovës nga Partia e Ilir Metës dhe Edi Ramës. Pse dështuan në varrimin e saj, fajtor nuk janë as Enver Hoxha dhe as Ramiz Alia, as Fatos Nano dhe as Ilir Meta, e aq më pak Edi Rama që për fatin e tij të zi dhe vetë Serbisë, e mori ta drejtoj Shqipërinë në kohën kur ajo ishte  bërë anëtare e NATO-s.

Sot nga Kosova mund të vjedhin dhe grabisin aq sa ka për të vjedhur dhe grabitur, sa për tokën e Kosovës shqiptarët duhet të jenë të qetë sepse tapia e këtij shteti është në hipotekën e Washingtonit, dhe kot e ka Beogradi me sejmenët e tij në Tiranë dhe Bruksel.

Por dhe ky fakt nuk i mohon të drejtën shqiptarëve që të protestojnë kundër autorëve të krimeve serbe në Kosovë që sot drejtojnë shtetin serbë pavarësisht nëse ata vizitojnë Gucinë, Prishtinën, Preshevën, Shkupin, Prevezën ose Tiranën. Shqiptarët nuk duhet ti harrojnë këto krime aq më pak autorët e tyre sepse dëshmorët e luftës së Kosovës nuk u flijuan që sot të bëhen pazare me tokën kosovare. Ndryshe, për çështjen e Kosovës nuk do të derdhej gjak por ajo do të zgjidhej nga serbët si Enver Hoxha, Ramiz Alia, Ilir Meta, Edi Rama…