Kush është problemi këtu!
nga Agim Popoci
Në kohën që në Këshillin Politik për Reformën Zgjedhore po bëhet lufta për koalicionet dhe mazhoranca po kërcënon se me ose pa Opozitën e Bashkuar ndryshimet në Kodin Zgjedhor do të miratohen më 1 Tetor, ndër demokratë ka filluar të krijohet bindja se pa Lëvizjen Socialiste për Integrim nuk mund të fitohen zgjedhjet; Ndërkohë, eksponentët e LSI-së japin fakte se Partisë Demokratike i duhet një fitore e pastër në mënyrë që të realizoj objektivat e saj vetëm pa Lëvizjen Socialiste për Integrim.
Shembulli më i freskët është paralajmërimi si deputete e ardhshme e LSI-së nga Ish-Drejtorja e Përgjithshme e Tatimeve dhe Ish-Zv/Ministrja e Ekonomisë, Briseida Shehaj, që na konfirmon se kush është problemi këtu!
Kur erdhi në krye të Tatimeve shqiptare, Briseida Shehaj tha se shpreson shumë që të largohen ata që nuk e ndjejnë veten dhe nuk kanë as minimumin e idealit për këtë vend. Ndonëse njihej si shoqja e Saimir Tahirit dhe më pas u zbulua CV-ja e saj e bujshme nga Ish-Presidenti Sali Berisha, ajo nuk la gjurmë në këtë mision, madje kujtohet vetëm për shprehjen e famshme “kush është problemi këtu”!
Dhe, kur u largua, nuk e kuptoi njeri nëse ka apo jo minimumin e idealit për këtë vend. Posti i radhës që rilindja i dhuroi Briseida Shehajt si Zv/Ministre e Ekonomisë u kuptua si detyrim i Shefit ndaj Sajme Qorrit, por me djegien e këtij të fundit, çuditërisht, Briseida u largua nga administrata publike dhe përfundoi e punësuar në bizneset e Ilir Metës.
Sot, Briseida Shehaj thotë se është socialiste dhe është në Lëvizjen Socialiste për Integrim ku socialistët mendojnë për socialistë. Ndërsa në PS janë rilindasit që duan të hanë socialistët. Gjykim interesant për një personazh që sot i kishte parë pamjet:
“Mjaft godiste me vezë kryeministrin me thirrjet ‘Nano ik!’ Hall i madh, duhet të ikte Nano të vinin këta. Tani ua kuptoj euforinë,” thotë Briseida Shehaj që vetë ishte “këta”, piku nga qielli i Sajme Qorrit për tu bërë Drejtore e Përgjithshme e Tatimeve, një post që socialistët jo lehtë e lëshojnë në duart e një njeriu!
Por, ky sot nuk është problemi edhe pse argumenti që LSI është parti ku socialistët mendojnë për socialistë është pjesërisht i saktë ndonëse del nga goja e Briseida Shehajt. E para, LSI nuk është parti por Shoqëri Aksionare; Dhe, që LSI mendon për kriminelët socialistë, kjo është plotësisht e saktë!
Briseida Shehaj si Ish-Drejtore e Tatimeve dhe Ish-Zv/Ministre nën kujdesin e Ilir Metës vjen në botën e LSI-së për Ministre, dhe ky është problemi real që mund ti ndodhë koalicionit qeverisës me PD-në. Nëse kemi parasysh faktet që sjellë Ish-Presidenti Sali Berisha atëherë si mund të quhet një prurje e tillë, pavarësisht që vjen nga njeriu që më shumë tund Kushtetutën në dorë, se sa që krahu i tundë dorën!
Për Briseida Shehajn, Drejtore e Përgjithshme e Tatimeve, Ish-Presidenti Sali Berisha theksonte se Nallbati përveç se shok i Edi Ramës në Akademinë e Arteve është dhe burri i tezës së Briseida Shehajt të Tatimeve; Briseida Shehaj e Tatimeve përveç lidhjeve të saj me Tahirin ka djalë halle Ergys Qiricin, Drejtor i Përgjithshëm te ministria e Ekonomisë i afërt me Ben Ahmetajn; Dhe, Ergys Qirici është kunati i Erion Braçes, kryetarit të Komisionit të Ekonomisë, ku ky i fundit bashkë me Taulant Ballën janë vizitorët pothuajse të përditshëm të Ben Ahmetajt në ministrine e Financave.
Meqë vërtetësia e fakteve për socialistët dhe rilindasit, të dala nga goja e Ish-Presidentit Sali Berisha, nuk diskutohen, protagonistët e këtij nepotizmi, si pjellë e rilindjes, e bënë dhe Briseida Shehajn, Drejtore të Përgjithshme të Tatimeve. Por jo vetëm kaq! Që të gjithë këta protagonistë sot janë aktiv, dhe propaganda se po shkatërrojnë socialistët nuk qëndron; Ata thjeshtë janë në garë se kush është më kriminel, të parët e tyre apo pasardhësit që tashmë po bëjnë namin në tokën shqiptare, dhe po kthejnë një komunizëm që paraardhësit do i kishin zili.
Ky është dhe problemi që mund ta minoj qeverinë e Partisë Demokratike në koalicion me Lëvizjen Socialiste për Integrim. Ose, mund edhe të mos ndodhë kjo fare, dhe Ilir Meta të bëjë qeveri me Partinë Socialiste, me pretekstin se rilindasit tashmë nuk po hanë më socialistët.
