Kush është themeluesi i ABI Bank: Depozitat e ’97-së, Serbia, apo…

Në këtë sezonë pushimesh me ofertën më të re për depozitat, American Bank of Investiments, ABI, jep mundësinë që të përfitoni më shumë nga kursimet tuaja.

“Depozitoni paratë tuaja për 3 vjet dhe përfitoni 3 muaj interes dhuratë!” thekson ABI në fushatën e saj të fundit duke dhënë edhe detajet dhe avantazhet e depozitës.

Deri këtu nuk ka asgjë të keqe, por simboli që ka zgjedhur për 3 arsyet e këtij deponimi në lekë, është i frikshëm. I frikshëm sa edhe një mendje e sëmurë do ta mendonte paksa, përdorimin e këtij simboli në tokën shqiptare!

Por kot nuk jetojmë në Shqipëri. Bota në Shqipërinë e çudirave!

Që është një bankë kot dhe mund të bëjë edhe fushata të këtij lloji, nuk e themi dot. Që abuzon me emrin “Amerikan” edhe këtë nuk e themi dot, kur nuk e tha vetë Ambasadori Lu, prezent në eventet e bankës.

Por, si mund ti ndodhë një banke, që sipas Shoqatës së Bankave të Shqipërisë, Banka Amerikane e Investimeve, ABI Bank, së fundi ka shënuar rritjen më të madhe të peshës së tregut sipas aktiveve, për të cilën ka shkruar edhe Pa Frikë, që të bëjë një reklamë kaq mediokre, që fyen më shumë se gjysmën e kombit shqiptar dhe rikthen në vëmendje masakrat dhe vrasjet serbe në Kosovë dhe jo vetëm, kjo nuk është e qartë.

Madje, ky simbol i tre gishtave është parë edhe gjatë trazirave të ’97-së, kur u vjedhë, u shkatërrua dhe u vra i gjithë jugu i Shqipërisë në emër të “duam paratë tona”, që edhe sot nuk dihet se ku janë!   

Nëse ABI Bank është themeluar me depozitat e firmave piramidale nga viti i errët 1997 atëherë ky simbol ka kuptim, ose nëse është themeluar me paratë e kriminelëve të luftës në Kroaci, Bosnje dhe Kosovë, edhe kjo kuptim. Por nëse asnjëra prej tyre nuk qëndrojnë, ABI Bank duhet të sqarohet!

ABI pjesë e grupit NCH Capital

Nuk është me rëndësi nëse gruaja e Kryeministrit Edi Rama është drejtore apo kryetare e bordit, kjo është politikë e bankës.

Në prezantimin e saj thuhet se Banka Amerikane e Investimeve është pjesë e grupit NCH Capital. Ky grup është një nga investitorët më të mëdhenj dhe të mirënjohur amerikanë me mbi 3 miliardë dollarë nën administrim.

Duke filluar nga viti 1992, gjithmonë sipas ABI Bank, NCH Capital ka krijuar një eksperiencë të gjatë në Europën Lindore me projekte dhe investime të rëndësishme në Rumani, Bullgari, Angli, Greqi, Ukrainë, Letoni, Moldavi, Serbi, Mal i Zi, Kroaci, Rusi, Brazil dhe Shqipëri.
NCH Capital është i regjistruar me autoritetet më prestigjoze mbikqyrëse Amerikane (Securities and Exchange Commission). Në fushën financiare NCH Capital ka pasur një përvojë të gjatë dhe të suksesshme në administrim bankash, shoqëri sigurimesh dhe institucione financiare në Rumani, Moldavi, Letoni dhe Shqipëri.

Në vitin 2007, NCH Capital filloi investimet në Shqipëri duke krijuar zyrën rajonale për Ballkanin Perëndimor dhe Greqinë.

Dhe, sikur të gjithë këto ti marrim si të mirëqena, një Grup kaq i fuqishëm që ka Zyra në Ballkan, aq më shumë në Kroaci, Mal të Zi, Serbi dhe Shqipëri, mund të përdor tre gishtat, pa e ditur se çfarë simbolizojnë! Kjo nuk është e mundshme!

Tre gishtat 

Përshëndetja me tri gishta, për injorantët e ABI Bank dhe jo vetëm, nga serbët konsiderohet si përshëndetje kombëtare përkatësisht nacionaliste serbe.

Kjo përshëndetje u bë e popullarizuar nga lideri i Lëvizjes Serbe për Ripërtrirje, SPO, Vuk Drashkoviç në demonstratat e opozitës serbe në vitin 1991 në Beograd. Në këtë miting, tre gishtat simbolizonin tri kërkesat të cilat SPO kërkonte të plotësohen. Drashkoviç është shprehur se inspirimin për përdorimin e këtij simboli ia kishte dhënë Kryengritja e Takovës në vitin 1815 ku ishin ngritur tre gishta nga Knjaz Milloshi.

Gjithashtu, kjo përshëndetje në hapësirat e Krajinës Serbe të Kroacisë është popullarizuar nga Dr.Jovan Rashkoviç, por sipas vajzës së tij, Sandës, ai nuk kishte ndonjë shpjegim.

Më vonë kjo përshëndetje ka marr edhe interpretime të tjera dhe është shndërruar në një përshëndetje  të përgjithshme serbe.

Përshëndetja paraqet analogjinë me mënyrën e të bërit kryq të besimtarëve ortodoks serbë, me tre gishtat e dorës së djathtë, që simbolizojnë, Atin e Shenjtë, Të birin e Shenjtë dhe Shpirtin e Shenjtë.

Gjatë operacioneve në Kroaci, Bosnje dhe në fund në Kosovë, ushtarët serbë kanë përdorur këtë përshëndetje. Për këtë arsye pjesëtarët e grupeve tjera etnike në Ballkan, në veçanti më të prekurit, kroatët, boshnjakët dhe shqiptarët, këtë përshëndetje e konsiderojnë si provokim.

Në Kosovë, kjo përshëndetje është përdorur nga ushtarët dhe paramilitarët serbë para fillimit të operacioneve të spastrimit etnik, dhe në largim pas masakrave të kryera ndaj popullsisë shqiptare. Këtë nuk e kanë fshehur edhe me rastin e tërheqjes së trupave serbe, pas hyrjes së forcave të KFOR-it në tokën shqiptare në Kosovë.

Për këtë arsye dhe jo për ato të depozitave, përdorimi i këtij simboli në një bankë, që përdor jo paqëllim edhe emrin “amerikane”, nëse nuk është themeluar me kapital të firmave piramidale të ‘97 ose paratë e kriminelëve serbë të luftës, është i pakuptimtë.

Në rastin më të mirë kjo mund të jetë edhe imagjinatë e një ideatori nga fusha e marketingut, por edhe në këtë rast ky njeri ose ky ekip, duhet urgjentisht të trajtohet nga psikologu, ekspert për devijimin e identitetit kombëtar dhe jo vetëm.

Ndryshe, për të mos ju shkuar puna dëm, dhe nëse nuk mendoni të keni respekt ndaj kombeve joserbe edhe në të ardhmen, këtë simbol mund ta përdorni në Serbinë Qendrore. Po, aty do të keni sukses…

Por, jo në tokën shqiptare, ku tre gishtat janë simbol i krimit serb!