“Kushtetuta e Kosovës”, kurthi i Statutit gjerman të Zajednicës

Pas takimit të së martës në Beograd ku përfaqësuesve të organizatave joqeveritare serbe dhe shqiptare nga Kosova, misioneve ndërkombëtare si dhe diplomatëve gjermanë iu prezantua Drafti i Statutit të Zajednicës apo, siç kanë qejf ta quajnë Hashim Thaçi dhe Isa Mustafa si firmëtar të Marrëveshjes, Asociacionit të Komunave me shumicë serbe, nga Fondacioni gjerman Friedrich Ebert Stiftung, FES, dhe Qendra Evropiane për Paqe, EIP, ndryshe nga Kosova, në Serbi po gëlon debati mbi këtë zgjidhje ndërsa publikohen pjesë nga ky Draft ku ata e cilësojnë “rrezik”.

Dhe, çuditërisht, mediat e afërta me pushtetin serb duke publikuar pjesë nga ky Statut i Zajednicës paralajmërojnë edhe rrezikun, ose siç e cilësojnë ata “kurthin”, që mund të vjen nga ky propozim, kur pikërisht ky “kurth” u bë për palën shqiptare: Gjithçka duhet të bëhet në përputhje me ligjet dhe Kushtetutën e Kosovës! Pse?!

Në 19 faqe të këtij Drafti, mediat serbe raportojnë se hartuesit e këtij dokumenti, FES dhe EIP, ishin zemërgjërë dhe respektuan atë që është parashikuar me Marrëveshjen e Brukselit, firmosur në vitin 2013, por formulimi “në përputhje me ligjet dhe Kushtetutën e Kosovës” në praktikë i bënë të pakutpimta të gjitha zgjidhjet!

Që në krye të herës, duhet thënë se çdo propozim i Friedrich Ebert Stiftung dhe Qendrës Evropiane për Paqe, i publikuar nga mediat serbe, është në kundërshtim me Kushtetutën aktuale të Kosovës.

Kështu, sipas propozimit të FES dhe EIP, Zajednica e komunave me shumicë serbe do të ketë kryetarin, nënkryetarin, këshillin, stemën, flamurin, të drejtën për të vendosur për shëndetësi, arsim, planifikimin urban, zhvillimin ekonomik… Parashikohet të ketë buxhetin e saj, pasurinë, të drejtën e financimit nga Serbia, pa paguar tatim dhe taksa, duke përfunduar me kulmin e asaj që është parashikuar me Marrëveshjen, të realizoj kontakte me Zajednicat tjera në botë.

“Por”, paralajmërojnë mediat serb, sipas këtij propozimi të FES dhe EIP, çdo kompetencë e Zajednicës nga shëndetësia deri te librat në gjuhën serbe “duhet të jetë në përputhje me ligjet e Kosovës”!

Mirëpo, këtu flen lepuri! “Por” i vërtetë është se kur Kosova ka Kushtetutë, pse këtij Statuti të Zajednicës i duhet Neni 17 Pika 4:

“Në çdo moment, Qeveria mund të shfrytëzoj të drejtën e saj kushtetuese ti drejtohet Gjykatës Kushtetuese për çështjet që kanë të bëjnë me kushtetueshmërinë e çfarëdo lloj aspekti të funksionimit të Asociacionit-Zajednicës. Vendimet dhe mendimet e Gjykatës Kushtetuese janë të detyruara për Asociacionit-Zajednicës.”

Pra, ndonëse çdo kompetencë thelbësore që e parashikon ky Statut i Zajednicës është në kundërshtim me Kushtetutën e Kosovës dhe nuk ka lidhje me atë që proklamuan dy ish-kryeministrat, Isa Mustafa dhe Hashim Thaçi, se do jetë një OJQ, tani del se do jetë vetëm Qeveria ajo e cila mund të shfrytëzoj të drejtën kushtetuese për të kontestuar çdo lloj aspekti të funksionimit të Zajednicës!

Pavarësisht se mediat serbe trumbetojnë që ky Draft i Statutit të Zajednicës nuk është konsultuar me Listën Srpska dhe do ti ipet në mënyrë ultimative Serbisë, gjë që nuk ka lidhje me realitetin, pyetja e vetme që shtrohet përballë Statutit të Fondacionit gjerman “Friedrich Ebert Stiftung” dhe Qendrës Evropiane për Paqe, çfarë nëse Qeveria heshtë ashtu siç heshtën qeveritë e kaluara, a do të mundet shteti i Kosovës ta mbajë mbi kurriz edhe një kompromis kaq të madh duke i lënë Zajednicës të fus hundët edhe në buxhetin kosovar, doganat dhe taksat, si dhe shëndetësinë të cilën sot e administron në mënyrën më kriminale të mundshme, duke drejtuar dhe spital në veri të Mitrovicës ku jo vetëm infermierët dhe doktorët por as pacientët shqiptarë nuk mund të shkelin!

Në fund, meqë pas afatit katërmujor për hartimin e Statutit i cili u dha në prillin e vitit 2018 nga BE nuk u respektua, Qeveria e Kosovës nuk ka as sot edhe një Draft të vetëm të një Statuti për Zajednicën ndërsa Serbia thotë se e ka por nuk e ka bërë publik, një gjë është e sigurt, Statuti i cili do ti dorëzohet të dërguarit special të BE për dialogun Kosovë-Serbi, Miroslav Lajçak, dhe është hartuar nga Fondacioni gjerman Friedrich Ebert Stiftung dhe Qendra Evropiane për Paqe, nuk do të zgjidhë as çështjen e veriut të Kosovës dhe as mirëqenien dhe sigurinë e serbëve në Kosovë, për derisa nuk ka mekanizëm të ndalojë kontrollin që ka mbi serbët, drejtuesi i grupeve kriminale në Veri, Aleksandar Vuçiç.