Kuvendi, Bylykbashi: PD do të drejtohet nga një organ kolegjial deri…

Deputeti Oerd Bylykbashi prezantoi në Kuvendin e Rithemelimit edhe ndryshimet në Statutin e PD, ku tashmë Partia Demokratike do të drejtohet nga një organ kolegjial deri në zgjedhjet e reja brenda partisë me parimin një anëtar një votë.

Ndryshon logo, ndryshon vula e kryetarit, tha Bylykbashi, duke shtuar se vula e kryetarit nuk do ketë më vlerë nesër.

Risi e këtyre ndryshimeve është dhe organizatave partnere, ku përveç FRPD dhe LDG, shtohet dhe Grupimi i Dhjetorit.

“Është nder për mua t ju drejtohem në këtë përvjetor. 31 vite më parë PD e themeluan anëtarë të thjeshtë të saj, sot 31 vite më pas, për herë të parë nga themelimi i saj, Kuvendin e thërrët anëtarsia. Po hyn në historinë e pluralizmit shqiptar, duke krijuar një precedent të jashtëzakonshëm.

Sot po japim provën se demokracia brenda partisë nuk është burokraci, por ideale e kontribut. Vlerat e PD gjatë këtyre viteteve në opozitë janë asfiksuar. Ndryshimet në statut në 2018 e 2021, në vend të çlironin energji, centralizuan pushtetin në duart e kryetarit, duke ia marrë pushtetin organeve kolegjiale. Organet u kthyen në vula noterie, shtabe ushtarake. Demokracia vjen nga ndarja e balancimi në organet e zgjedhura.

Sot propozojmë ndryshime që kanë për qëllim të fuqizojmë anëtarët e PD, dhe organet e zgjedhura prej tyre në qendër e në bazë. Sot synojmë të projektojmë një PD, ku energjitë e anëtarëve rriten nga gara e nuk shtypen nga urdhri i eprorëve. PD është parti që mbron vleron konservatore demokratike e euroatlantike,” tha Oert Bylykbashi.

Ja ndryshimet:

Parimi një anëtar – një votë: Kjo për zgjedhjen e anëtarëve në qendër, por edhe ato të degëve që nuk zgjidheshin më parë.

Votimet primare: Për të zhbërë praktikën negative të Lulzim Bashës, kur kandidaturat shpallen në minutën e fundit. Tashmë demokratët i zgjedhin me votën e tyre.

Referendumi: Vendime të rëndësishme do merren nga anëtarësia.

Fraksionet: Partia bëhet më e madhe, jo duke përjashtuar, por duke njohur grupimet ndryshe. Të mendosh ndryshe është vlerë, jo kërcënim për kryetarin.

Organet kolegjiale:  Ato që u dobësuan nën kërkesat e kryetarit për më shumë pushtet, do forcohen. Kryetari nuk i përdor më ato si vulë noteri. Forcohen edhe organet kolegjiale edhe në bazë.

Kryetari humbës: Kryetari që humb zgjedhjet, i mbaron mandati menjëherë dhe pa ekuivok. Ky mekanizëm incentivon lidershipin e suksesshëm pa nxitur kultin e liderit.

Organizatat partnere: Përveç FRPD dhe LDG, shtohet edhe Grupimi i Dhjetorit. Do kenë akses më të madh në listat e kandidimit. Forcohet dhe garantohet pavarësia e tyre stature.

Simbolet e PD:  Basha zhduku logon dhe simbolet e partisë në vitin 2017. Sot burokratët e PD i shohin simbolet si marka tregtare. Ato do jenë shumë të rëndësishme për PD-në. Ndryshon logo, ndryshon vula e kryetarit. Vula e kryetarit sot nuk do ketë më vlerë nesër.

Zgjedhjet në PD: Partia do futet në një fazë reformimi me anë të zgjedhjeve. Zgjedhjet me ‘një anëtar- një votë’ do përcaktojnë organet e reja. Propozojmë që tranzicioni drejt organeve të ngritura me votën tuaj, të ngrihet një organ kolegjial dhe i përkohshëm me figura të njohura në PD, do të garantojë funksionimin e partisë.