Kuvendi i Lulzim Bashës, ja Rendi i Ditës
Ndërsa vazhdojnë akuzat dhe ofendimet nga çdo vrimë e selisë së Partisë Demokratike në drejtim të liderit historik, Sali Berisha dhe mbështetësve të tij, drejt fundit janë dhe përgatitjet për Kuvendin e thirrur nga Kryetari i shkarkuar i PD, Lulzim Basha, i cili zhvillohet nesër në Pallatin e Kongreseve.
Mësohet se tashmë është përcaktuar dhe Rendi i Ditës ndonëse pritet mbledhja e Kryesisë e cila si zakonisht edhe sot është thirrë për të ngritur dorën për vendimet që ka marrë Luli me shokë:
Rendi i ditës:
1- Vendimmarrje mbi situatën politike me si edhe marrjen e masave për të mbrojtur interesin e PD, duke mos lejuar që problemet apo interesat personale të secilit anëtar të dëmtojnë interesat elektorale dhe politike të PD dhe agjendën e saj politike në përballjen me regjimin e Edi Ramës.
2 – Miratimin e Aksionit Politik për të ardhmen e Partisë Demokratike dhe shpalljen e Platformës Qytetare për demokraci, për rikthimin e legjitimitetit dhe demokracisë në vend si edhe ndërtimin e mekanizmit të bashkëpunimit me të gjitha forcat e shoqërisë në përballjen me regjimin e Edi Ramës , i cili në aleancë me krimin e organizuar ka shkatërruar çdo mjet të funksionit demokratike të shtetit shqiptar dhe po nxit braktisjen masive të vendit , kryesisht nga të rinjtë.
3 – Miratimin e programit organizativ të Partisë Demokratike për të përgatitur strukturën e partisë për zgjedhjet e ardhshme , sipas Objektit “ partia Demokratike , partia e demokratëve dhe çdo shqiptari të ndershëm-Forca e vetme politike që do të sjellë ndryshimin në Shqipëri.
Ndërkohë në mbledhjen e Kryesisë së shkarkuar të PD është propozuar që subjektet e dekriminalizimit dhe personat e shpallur NON GRATA, të mos jenë anëtarë të strukturave drejtuese në PD.
Gjithashtu është propozuar krijimi i Aleancës Qytetare për Demokracinë si organizatë partnere e Partisë Demokratike.
Mësohet se nuk do të ketë përjashtime nga Partia Demokratike. Të gjitha këto, pritet të votohen ditën e nesërme në Kuvendin Kombëtar i cili do të zhvillohet në Pallatin e Kongreseve.
Më herët është bërë e ditur dhe ngritja e Komisionit të Përhershëm Statutor, anëtarë të së cilës janë Enkelejd Alibeaj, Jorida Tabaku, Ervin Salianji, Kreshnik Çollaku, Taulant Zeneli, Jonila Godole.
