Kuvendi i PD dhe 35 deputetët hajdutë!
nga Agim Popoci
Kuvendit Kombëtar të PD nuk i mungonte Antoine Galland dhe as Hanna Diyab për ta bërë përrallë synimin e 30 Prillit, sepse aty ishte, Sigurimi i Shteti i cili e dinte fjalën magjike që “hapte sesamin”: Bashkimi!
Nuk e minoi dot me mediat që bombarduan pa ndërprerje procesin e Rithemelimit të PD dhe liderin e saj, Sali Berisha, duke i bërë biografinë nga djepi e deri në krye të “Foltores”, as me Vendimin e Gjykatës së Apelit që i dha një goditje të fortë juridike lëvizjes e cila po bashkonte demokratët, kështu që Sigurimi u detyrua të futet brenda Kuvendit Kombëtar në mënyrë që të mos ndodhë ajo që do të rrezikonte proceset kriminale të Partisë Socialiste, Edi Ramës dhe asqerit të tij, Lulzim Basha.
Teknologjia që në hyrje të Kuvendit paralajmëronte një transparencë ekstreme, çdo delegat që futej në sallë automatikisht regjistrohej prezent në punimet e Kuvendit, ndërsa relaksi që pasqyrohej në çehret e organizatorëve të Kuvendit Kombëtar të PD ishte një ogur i mirë për mbarëvajtjen e tij!
Punimet i hapi Lediana Fratari, e bija e Hajredin Fratarit, si përfaqësuese e të përndjekurve politik, e cila edhe pse si kandidate për deputete në vitin 2021 la shije të mirë, pritej një mesazh nga kjo shtresë që do të vinte nga Mirëdita ose Kukësi, aty ku lëvizja e Dum Bashës dha një goditje shumë të fortë sa konvertoi shumë antikomunistë të këtyre zonave në antidemokratë të tërbuar!
Gjithsesi, kjo nuk quhej goditje ndaj synimit kryesor që kishte Kuvendi, bashkimin e PD në një trup të vetëm. Dhe, mediat, ato për të cilat kurrë nuk u kujdes Sali Berisha, u futën në veprim nga Sigurimi i Shtetit!
Ndërsa po gjëmonte zëri mbi votimin e Komisionit të Drejtimit të Punimeve të Kuvendit dhe Sekretariatit Teknik, mediat nuk raportojnë për fillimin zyrtar të punimeve të Kuvendit me 1.425 delegatë nga 1.830 sa ishin në total por shpërndajnë lajmin se Sali Berisha ka dështuar në bashkimin e PD sepse në sallë mungojnë plot 35 deputetë nga 52 prej tyre sa numëron Grupi Parlamentar.
Dhe derisa dumbashistët po i gëzoheshin faktit se Partia e tyre Demokratike dështoi ndërsa mungesa e 35 deputetëve po interpretohej në mënyrë të ndryshme, Sigurimi i Shtetit përkundër angazhimit nuk arriti ti bindë as ata vetë se nuk ishin në Kuvend vetëm për të krijuar idenë e dështimit të bashkimit të PD! 31 prej tyre ishin kundër Lulzim Bashës, pra kundër bashkimit që e kishte në kokë Dum Basha me Edi Ramën, e si erdhën deri tek mandatet e deputetit ishte vetëm çështje kohë që do të zbuloheshin, ashtu siç dolën zbuluar 6 prej tyre në Shkodër në zgjedhjet e 6 Marsit, kur u pa se nuk kanë kurrfarë vlere pasi fitoi ai të cilin e luftuan në çdo lagje dhe familje shkodrane, kandidati i Rithemelimit, Bardh Spahia.
Në këtë situatë, Sigurimi i Shtetit u detyrua të intensifikoj aktivitetin brenda Kuvendit që të mos i lente vend rastësisë, e folësit ishin nga më të ndryshmit, nga militantët e Saliut deri te kundërshtarët e tij të padiskutueshëm, dhe, rastësia ndodhi: Sali Berisha u rrëzua pranë foltores!
Ndonëse truri i sëmurë i Sigurimit të Shtetit nuk shkonte deri tek ky lloj denigrimi, ai ndodhi, dhe ekranet televizive si dhe portalet mbushën kokat shqiptare edhe me një lajm të hidhur nga Kuvendi, tashmë jo vetëm për dështimin e bashkimit të PD, por dhe për liderin që është projektuar si Kryetar dhe përveç se NON GRATA nga SHBA, vërtetohet se nuk ec dot.
Që lideri historik i PD u çua menjëherë, vazhdoi fjalimin për një orë me mesazhe të forta për të gjithë dhe ato të pajtimit edhe për 35 deputetët që nuk ishin aty, nuk ishin në interesin e Sigurimit të Shtetit, pra mediave, dhe si të tilla u futën nën tapetin “Rrëzimi i Berishës” në pritje të rezultatit të votimit për Këshillin Kombëtar.
Në momentin kur bojkotimi i këtij Kuvendi nga 35 deputetë po pranohej se ishte një dështim i madh, ku rol të padiskutueshëm kishte karikimi i madh që iu bë demokratëve për ditën e bashkimit, ashtu si dhe niveli i folësve që lente shumë për të dëshiruar, opinionit publik i vjen një befasi e këndshme me numërimin e votave, Live.
Meqë kjo nuk ishte në skenarin e Sigurimit të Shtetit, ata e kaluan lehtë këtë mrekulli demokratike duke pritur publikimin e listës së fituesve të Këshillit Kombëtar, për të thënë dhe fjalën magjike të varrosjes së Kuvendit, “hapu sesam”; Që rezultoi se ishte dhe gabimi më fatal që mund të bëhej kundër një Kuvendi që kishte shanse të dështonte edhe vetë!
Ndër emrat e Këshillit të ri Kombëtar, Sigurimi i Shtetit urdhëron të raportohet se janë plotë 16 tropojanë, që sipas propagandës së mbjellur për 30 vjet në kokat shqiptare është dhe më e keqja që mund ti ndodhë vendit të shqipeve.
Dhe jo vetëm kaq!
Filloi dhe sitja e këtyre tropojanëve! “Famëkeqi” Agron Kuliçaj, raportojnë mediat duke harruar se ky emër figuronte edhe në Këshillin Kombëtar të Lulzim Bashës, ku votat nuk dihet se kush i ka numëruar; Dhe, është interesante se nuk u fol asnjë fjalë për të kaluarën e tij profesionale sepse për Sigurimin, e keqja më e madhe e Agronit ishte se është tropojan!
Me të njëjtin gjykim u kryqëzua edhe Andi Mustafaj i cili ishte edhe në radhët e Këshillit Kombëtarë që u drejtua nga Lulzim Basha, ama kishte një “njollë” që Sigurimi nuk e honeps dot, tropojan! Interesant është se ky gjykim është i ngjashëm me mendësinë që ka Lulzim Basha, dhe nuk i pengoi qoftë edhe një gazetari që raportoi nëse kishte ose jo ndonjë kontribut në Partinë Demokratike!
Në rastin e Andit edhe “njolla” ka një veçori, sepse është i lindur në Tiranë por Sigurimi nuk ia falë “krimin” që është djali i tropojanit Besnik Mustafaj; Që në skedarët e tyre e gëlltisin me shumë vështirësi faktin që ishte dhe ish/ministër i Jashtëm!
Ishte dhe një And i lindur në Tiranë ndonëse i biri i Sahit Dollapit! Po, i atij Sahitit që financoi partinë dhe i shërbeu deri në thyerje kockash Lulzim Bashës. Por, nuk mjafton kjo sepse i biri nuk guxon të mendoj me kokën e vetë, thoshte dhe thotë Sigurimi i Shtetit, ndryshe do të bëjë pis deri në neveri edhe përmes mediave, me damkën, tropojan!
Në tabelën e qitjes përfundoi edhe diplomati Mal Berisha! Para këtij Kuvendi të gjithë e njihnin si Ambasador dhe si Këshilltar të Kryetarit të PD, Lulzim Basha, por kjo nuk ka rëndësi kur ai nuk është Kryetar dhe Mali nuk është Këshilltar i Kryetarit, kur është tropojan! Mëkat ky i madh për Sigurimin dhe mëkat shumë më i madh që e raportojnë mediat si e keqja më e madhe e diplomatit Mal Berisha, që i dha shumë këtij vendi por mik i Sigurimit të Shtetit nuk u bë dot!
Seç ka një alergji ky Sigurimi i Shtetit nga mbiemri “Hajdarmataj”! Iu qep Ish-Kryeprokurorit të Krimeve të Rënda, Besim Hajdarmataj, deri sa e hoqi nga sistemi i drejtësisë në vetting duke e akuzuar si nipi i Sali Berishës! Kështu ndodhi dhe me deputeten Mimoza Hajdarmataj! Përveç “damkës” tropojane, i ngjeshën dhe asaj si mbesë e Sali Berishës, ndonëse mediat nuk e morën as mundimin më të vogël pas terrorit që i bënë prokurorit Besim, ta verifikojnë nëse edhe këtu Sigurimi ia ka futur kot. Apo ky është dhe qëllimi!
Këtij linçimi nuk i ka shpëtuar as Bujar Vukaj! Pavarësisht se ishte dhe në Këshillin e kaluar Kombëtar i cili u formua nënë urdhrat e Lulzim Bashës, sot Sigurimi thotë se u bë nami, edhe ky tropojan na qenka votuar në Këshillin e ri Kombëtar! Po, është ky Bujar Vuka ish-drejtor i Doganave për të cilin Partia Socialiste hodhi lum me akuza kur ishte në opozitë, se si shpërndante lekë e u kapte me karta identiteti, por Edi Rama mbylli gojën kur kapi pushtetin! Ç’i do gjithë ato akuza, kur sot Sigurimi thotë se mjafton një dhe e vetme, tropojan!
Qershia mbi tortë është Jamarbër Malltezi! Sigurimi e çon në piedestal mëkatin e dhëndrit të Sali Berishës, dhëndër i tropojanit! Pse ishte zgjedhur nga Lulzim Basha kreu i Departamentit të Ambientit, pyjeve dhe Turizmit nuk ka rëndësi, madje as e kaluara e tij profesionale, por Sigurimi i Shtetit habitet se si nuk ka turp ky pedagog të jetë dhëndër i Sali Berishës.
Me të tilla akuza absurde kaluan ditë dhe net të për plot 16 të zgjedhur të Këshillit të ri Kombëtar dhe Sigurimi i Shtetit vazhdon proklamimin mbi rrezikun tropojan, duke lënë mënjanë 35 deputetët që pa dashje filluan të zbërthehen, madje na dolën nga propaganduesit e Lulzim Bashës në luftën kundër Sali Berishës, se kemi të bëjmë me deputetë që kanë paguar deri në 300 mijë euro tek Kunati, për këtë post!
Sot, pak rëndësi ka sa paguan këta deputetë që thjeshtë janë hajdutë të besimit demokrat dhe Edi Rama i mbron nga SPAKU, e rëndësishme është që të analizohet se çfarë nuk shkoi mirë në Kuvendin Kombëtar të PD ku Sigurimi i Shtetit arriti të fut hundët!
Për ata që vetëkënaqen me arritjet e Kuvendit Kombëtar të PD më 30 Prill, sikur edhe ti vlejë teoria e bashkimit, nëse sot Edi Rama jep dorëheqje kush do të jetë pjesë e Qeverisë Berisha! Në Kuvendin e 30 Prillit, qoftë ai edhe i PD të bashkuar, nuk i pamë…
