Kuvendi i PD për djathë!
nga Agim Popoci
Sot kur raportohet fshehja nga shteti e vdekshmërisë nga koronavirusi e madje edhe asaj amtare dhe foshnjore, kur Banka Botërore flet për një nivel varfërie prej 33 për qind, Kryeministri Edi Rama nuk e shet më sapunin për djathë por lëshon lukuninë e mediave që ka nën kontroll që të merren me Kuvendin e PD që organizon “Foltorja” ose më saktë të pakënaqurit me politikën e kryetarit aktual të Partisë Demokratike, Lulzim Basha!
Mediat në shërbim të Edi Ramës, që të gjitha pa dallim race e feje por me një ideologji të qartë komuniste, nuk sqarojnë se si është e mundur që për 9 muaj të vdesin vetëm në Tiranë 5.546 qytetarë ose 44 për qind më shumë se në vitin 2019 dhe 20 për qind më shumë se në vitin 2020 kur pandemia ishte në kulmin e saj, edhe kur këto të dhëna i raporton INSTAT, ama gjejnë kohë të arsyetojnë në detaje vendimin e Lulzim Bashës për mbajtjen e Kuvendit Kombëtar më 18 Dhjetor dhe jo siç e kishte kërkuar “Foltorja” më 11 Dhjetor.
Dhe jo vetëm kaq! TV dhe gazetat që deri dje raportonin për “Lulin që fle gjumë”, po ato media sot flasin për Lulin si një lider demokrat që po reformon Partinë Demokratike dhe merr vendime “të forta” ndërsa në “Foltore” shkon llumi i opozitës.
Por, ato nuk ndalojnë këtu! Analistët e majtë që i dhanë dorë Edi Ramës të vijë në pushtet duke akuzuar Sali Berishën me kuç e me maç, me urdhër të Ramës, këta bastardë që kurrë as PD nuk i thanë por e etiketuan si “Shqup”, sot i bëjnë lavazh trurit shqiptar pse në krye të kësaj selie duhet të qëndroj me patjetër Lulzim Basha.
Nga dita kur doli raporti i Bankës Botërore që fliste për një nivel varfërie prej 33 për qind të atyre që jetojnë me më pak se 5.5 $/ditë askush nuk u shqetësua, madje mediat në shërbim të Edi Ramës trumbetonin katastrofën në rast të kthimit të Sali Berishës në krye të PD, me analistët nga ana tjetër që vazhduan t’ia shesin këtij populli të uritur, Kuvendin e PD për djathë!
Pse Berisha nuk pranon 18 Dhjetorin e Bashës për të mbajtur Kuvendin Kombëtar të Partisë Demokratike ishte shqetësimi i tyre dhe jo fakti që 33 për qind e shqiptarëve jetojnë në varfëri; Dhe, çuditërisht, sipas tyre, demokracia ishte e rrezikuar nëse Kuvendi nuk mbahet më 18 Dhjetor, dhe ajo nuk kërcënohej nga fakti që nuk përfillet kërkesa e 4.200 nga 7.600 delegatë sa ka Kuvendi i PD, që ai të mbahet më 11 Dhjetor! Po, pak rëndësi ka kjo kur këtë datë nuk e miraton Edi Rama dhe analistët që me Statut të PD në dorë e kundërshtojnë nëpër studiot televizive të ndihmuar nga qindra portale që bënë pis edhe botën e Zuckerbergut, në përpjekje për të bindur shqiptarët se do ti zë belaja nëse Saliu vjen në krye të PD, meqë “Shqupin” për momentin e kanë nxjerrë nga fjalori!
I frikshëm është dhe fakti kur për Edi Ramën dhe mediat që ka në shërbim, Kuvendi i PD më 18 Dhejtor është shumë më i rëndësishëm jo vetëm se ai i 11 Dhejtorit, por edhe se raporti i KLSH që konstaton se shteti fshehë shifrat e vdekshmërisë amtare dhe asaj foshnjore. Askush nuk pyeti pse ndodhë kjo ama u investua një botë e tërë mediatike që të degradohen 4.200 firmat e Saliut që kërkonin mbajtjen e Kuvendit të PD më 11 Dhjetor!
Dhe në fund, miratimi i Buxhetit për vitin 2022! Në seancën plenare për miratimin e Buxhetit për vitin 2022, shqiptarët demokratë ose jo, me Berishën ose jo, kishin rastin të shohin se jo vetëm Edi Rama por edhe kuvendarët e 18 Dhjetorit duan të shesin Kuvendin e PD për djathë!
Njeriun, të cilit të gjithë organet i kishin dalur në fushë që në vitin 2000 me foton ku shihej ashtu siç e kishte lindur nëna, si dhe emrat e bashkëpunëtorëve të tij biznesmen që i favorizon me vite të tëra, mbështetësit e Kuvendit të 18 Dhjetorit e “nxorën” zbuluar në seancë plenare për Buxhetin 2022, duke i thënë shqiptarëve se ai e paska gojën e prishur dhe lekët u jep PPP-vë të bashkëpunëtorëve.
Dhe, siç e ka zakon Edi Rama, ai u mburrë si me allatet e tij, me gojën e prishur dhe oligarkët, dhe Buxhetin 2022 e miratoi ashtu siç e kishte menduar, me 76 vota për!
Por, pavarësisht këtij epilogu, se sa i fortë është Kuvendi i 18 Dhjetorit këtë nuk e përcakton Edi Rama, dhe, sot, aq më pak Lulzim Basha! Këtë shqiptarët do ta konfirmojnë më 11 Dhjetor meqë “faktet” se sa gojëprishur është Edi Rama dhe si i favorizon miqtë e tij biznesmenë ata i kishin parë edhe para se të vij Lulzim Basha në krye të Bashkisë Tiranë, kur ai shkoi atje dhe nuk doli asnjë fakt, pas ardhjes në krye të PD dhe kur arriti marrëveshje me këtë shpërdorues të parasë publike më 17 Maj duke formuar një qeveri të përbashkët!
Sot, demokratët në mëshirë të fatit, nuk e hanë më sapunin për djathë! Pas 25 Prillit, demokratët pritën një akt ribashkimi nga Kryetari i tyre aktual dhe këtë nuk e përjetuan. Pse sot i besojnë Ish-Kryetarit Sali Berisha më shumë se Kryetarit aktual të PD dhe kanë vendosur ta mbajnë Kuvendin Kombëtar më 11 Dhjetor, kjo nuk është më çështje e tyre por vetëm e një njeriu që nuk e sheh veten në pasqyrë, dhe ai është, Lulzim Basha!
Dhe, sot, duhet ta ketë të qartë edhe Edi Rama që futi dorën në xhepin dhe kutinë e votimit të demokratëve dhe jo vetëm, i varfëroi më shumë se kurrë duke shpërdoruar gjithçka që kishte në dorë, Kuvendin e PD të 18 Dhjetorit nuk mund ta shes për djathë!
