Lajm i madh, Yuri Kim: Shqipëria me Gjykatë Kushtetuese funksionale!

Pas dekretimit të anëtarit të gjashtë të Gjykatës Kushtetuese, përparim Kalo, nga ana e Presidentit të Republikës, ka reaguar Ambasadorja e SHBA në Tiranë, Yuri Kim, duke theksuar se Shqipëria tashmë me një Gjykatë Kushtetuese funksionale, përmbush kushtin për hapjen e negociatave për anëtarësim në BE.

“Lajm i madh: Presidenti Meta ka dekretuar Përparim Kalon si anëtarin e 6 të Gjykatës Kushtetuese. Sapo Kalo të betohet nesër, do të ketë kuorum. Shqipëria do e mbyllë 2020 me një Gjykatë Kushtetuese funksionale, pas pothuajse 3 viteve pa të. Presidenti, KED & Parlamenti kanë meritat më të mëdha,” thekson Ambasadorja amerikane në reagimin e saj përmes rrjetit social Twitter duke shtuar:

“Ky ishte rezultati i veprimeve urgjente nga udhëheqësit, në linjë me opinionin e Komisionit të Venecias. Me një Gjykatë Kushtetuese funksionale, Shqipëria përmbush kushtin për hapjen e negociatave për anëtarësim në BE,” vlerëson Ambasadorja e SHBA në Tiranë, Yuri Kim duke përfunduar:

“Ky është një hap gjigand përpara! Urime popullit.”

Ndryshe, Presidenti i Republikës, Ilir Meta, ka emëruar anëtarin e gjashtë të Gjykatës Kushtetuese, Përparim Kalon. Në bazë të renditjes nga KED e cila iu dërgua Presidentit të Republikës, Përparim Kalo kishte 90.29 pikë, dhe qëndronte më lart në listë se Aleksandër Toma që ka 75.57 pikë.

Kështu, Gjykata Kushtetuese tani ka gjashtë anëtarë: Vitore Tusha, Marsida Xhaferllari, Fiona Papajorgji, Elsa Toska, Altin Binaj dhe Përparim Kalo.