Lajme të mira nga Italia, 1.648 raste të reja dhe 1.590 të shëruar nga koronavirusi

Numri i të vdekurve nga koronavirusi në Itali vazhdon të jetë i lartë brenda 24 orëve, 812, por shpresdhënëse janë numri i rasteve të reja, 1.648 në krahasim me dje që ishte 3.815, dhe numri i të shëruarve që është më i larti që kur nisi emergjenca, 1.590 derisa dje ishin 656 të shëruar.

“Sot janë regjistruar 1.590 të shëruar, që është numri më i lartë që nga fillimi i krizës së koronavirusit,” tha Angelo Borreli nga Mbrojtja Civile duke shtuar se 3,981 pacientë në terapi intensive, janë 27,295 të shtruar me simptoma dhe 43,752 apo 58 për qind e të infektuarve, janë në izolim në shtëpi me simptoma të lehta ose pa simptoma.

Kështu, aktualisht pozitivë me COVID-19 janë 75.528 persona, 11.591 të vdekur dhe 14.619 të shëruar,

Ndërkohë lajm i mirë është se janë bërë donacione më shumë se 63 milionë euro nga qytetarë italianë në llogarinë e Mbrojtjes Civile, para që do të shërbejnë për të blerë e pajisje mbrojtëse për mjekët dhe ekipin sanitar që është në frontin e parë të luftës ndaj koronavirus, dhe janë 11.805 vullnetarë që i janë bashkuar ekipeve të ndihmës.

63 mjekë të vdekur

Agjencia e lajmeve ANSA raporton se edhe 2 mjekë kanë ndërruar jetë duke e çuar në 63 numrin e të vdekurve në Itali. Ndërkohë janë infektuar 8.358 punëtorë shëndetësorë, 595 më shumë se një ditë më parë.