Lamtumirë Donald Rumsfeld!
nga Agim Popoci
Me pardesy në krah, doli nga salla e konferencës në Sheraton dhe po vinte drejt neve tre gazetarëve nga Tirana, Zagrebi dhe Shkupi që po e prisnim për një intervistë ekskluzive.
-Ti je Agimi, iu drejtua kolegut tim trupmadh kroat, ai bëri me gisht prej meje, më shikoi, dhe pasoi pyetja rrufe ndërsa vazhduam të ecim drejt një salle:
-Ke të njëjtin mendim për luftën në Afganistan, si 5 vjet më parë?
-Po, isha i prerë! Mu duk sikur i pëlqeu dhe ai vazhdoi:
-Nuk shkon mirë atje, na iku nga Tora Bora! E kishte fjalën për aksionin e kapjes së terroristit Osama Bin Liden, të cilin aksion e kisha kritikuar përmes një shkrimi “S’do të ketë më Afganistan, e pastaj?!” por u pa se dinte, shumë më shumë, se kush ishim NE.
Pyetjet tona të intervistës ishin për Adriatik 3 dhe anëtarësimin në NATO, e për pjesën tjetër të vizitës së Sekretarit amerikan të Mbrojtjes, Donald Rumsfeld, në vitin 2006 në Tiranë është thënë e gjitha, edhe ato që vetëm syri dhe mendja e Sorosit i sheh, dhe atëherë kur u bë e qartë se pa këtë njeri Shqipëria nuk futet kurrë në NATO! Kjo u konfirmua edhe më vonë kur ai nuk ishte më Sekretar i Mbrojtjes ose siç e quanin, “ministër i luftës” ndërsa flisnin vetëm për vendosmërinë e tij!
Gjithmonë në frontin e luftës, gjithmonë nën sulmin mediatik të porositur nga rivalët politikë të paskrupullt, por, kurrë nuk bëri hapa mbrapa ose të shfajësohet duke akuzuar ekipin e tij.
Punonjësit e Pentagonit rrëfyen se si më 11 Shtator 2001 me rastin e sulmit terrorist ai u fut në flakë për të ndihmuar të plagosurit, por këtë nuk e thanë të marrët dhe mediat e tyre ama e fajësuan kur shpërthyen fotot me ushtarë amerikanë duke torturuar të arrestuarit.
Donald Rumsfeld heshti, ngeli në nivelin e një shefi të Pentagonit dhe nuk u lëshua në debat me llapaqen komunistë që i nxorën edhe dokumentin e firmosur të 2 Dhjetorit 2002. U akuzua për lejimin e torturave ndonëse në dokument thuhej se “lejohet marrja në pyetje deri në 20 orë”! Kjo pra ishte leja për torturë sipas demokratëve që kur janë në pushtet tërbohen, thirrin në ndihmë Sorosin, akuzojnë e sajojnë në mënyrë të paskrupullt vetëm për të ardhur në pushtet; Por, njeriu i madh Rumsfeld nuk doli nga vetja!
Huffington Post shkoi dhe më larg! Në dokument ishte një shënim në fund, ku gazeta e bëri fakt të kryer se ishte shkrimi i Sekretarit të Mbrojtjes, Donald Rumsfeld, e ku thuhej: “Unë qëndroj në këmbë tetë deri në dhjetë orë në ditë. Pse qëndrimi është i kufizuar në katër orë.”
Fobi, stres, torturë, ishin fjalët që shoqëruan këtë publikim të pakuptimtë e që u interpretua si leje për të torturuar terroristët e arrestuar!
Po kush ishte terrorist për Donald Rumsfeld? Duhet të ishe afganë ose irakenë me patjetër! Presidenti i Serbisë, Boris Tadiç, pas vizitave me zyrtarët më të lartë amerikan deklaroi se kur e kishte takuar Sekretarin e Mbrojtjes, Donald Rumsfeld, i kishte rrëfyer se si është e vështirë të gjendet Ish-Komandanti i Ushtrisë serbe të Bosnjes, Ratko Mlladiç, që ishte dhe person në kërkim për krime lufte, e ai i kishte thënë:
“Po, edhe unë kam problem të ngjashëm me Osama Bind Ladenin; nuk mund ta gjejë!”
Donald Ramsfeld u fajësua për luftën në Afganistan dhe Irak por kur firmosi thirrjen drejtuar Sekretarit të Mbrojtjes, Christopher Miller, që të përmbahet nga implikimi në përpjekjet e Donald Trump për të mbajtur postin e presidentit dhe të ndihmojë në tranzicionin e administratës së presidentit të ri demokrat, heshtën si ata që i kontrollon Sorosi ashtu dhe ata që i kontrollon vetë Presidenti i ri Biden por jo dhe ata që e njihnin vetëm një Rumsfeld, atë që do Amerikën!
“Futja e forcave të armatosura amerikane në zgjidhjen e rezultateve zgjedhore do të na çonte në një territor të rrezikshëm, të paligjshëm dhe antikushtetues,” theksonin Sekretarët e Mbrojtjes, firmëtarë të kësaj letre ndër të cilët edhe Donald Rumsfeld, që ishin të qartë se zyrtarët civilë dhe ushtarak që drejtojnë dhe zbatojnë masa të tilla duhet të përgjigjen, duke përfshirën dhe mundësinë e ndjekjes penale.
U çuditën me Rumsfeldin pse firmosi këtë letër, por heshtën, po nxitonin ta merrnin pushtetin dhe nuk kishin kohë për fjalë të mira ndaj një republikani që e akuzuan që nga viti i largët 1975 kur për herë të parë u bë Sekretar i Mbrojtjes dhe deri ditën që u shua!
Nga ky llum morën shembull ose me mirë të themi urdhër, dhe mediat shqiptare ndonëse janë të qartë se vetëm falë këtij njeriu Shqipëria është anëtare e NATO-s!
Komunizmi vret, thoshte Azem Hajdari! Por edhe kur nuk po vret, po përdhos kufomat e atyre që nuk arriti ti vras! Ky është përkufizimi i vetëm që mund ti bësh sot mediave shqiptare të cilat pa dallim financohen nga ky llum ndërsa hedhin baltë mbi Ish-Sekretarin e Mbrojtjes, Donald Rumsfeld, edhe kur ai ndërroi jetë!
Dhe jo vetëm kaq! Po ky urdhër ishte në fuqi dhe për Presidentin dhe Kryeministrin, prej të cilëve mungoi dhe një reagim kortezie për ndarjen nga kjo jetë e njeriut që i mërziti duke e bërë Shqipërinë pjesë të Aleancës Veriatlantike.
Kështu, Donald Rumsfeld u nda nga kjo botë duke u sulmuar nga mediat e kuqe por jo duke u arsyetuar me baltosjen e kolegëve të tij. Propagandë nga e cila humbi vetëm Amerika dhe ushtria e saj ndërsa vetë Donald Rumsfeld, deri në çastin e fundit të jetës së tij, ngeli ai që ishte, siç e përshkroi Ish-Sekretarja e Shtetit, Condoleezza Rice, kur kjo zemër e madhe pushoi së rrahuri: Nënpunës i vendosur i përkushtuar shtetëror!
Lamtumirë Donald Rumsfeld!
