Lamtumirë George H.W. Bush!

“Ku po shkojmë,” pyeti Presidenti Bush.

“Po shkojmë në qiell,” u përgjigj Baker.

“Atje dua të shkoj,” tha Ish-Presidenti i SHBA, George H.W.Bush mëngjesin e së premtes, gjatë takimit me mikun tij dhe Ish-Sekretarin e Shtetit, James A. Baker III, dhe 13 orë pas këtij takimi shuhet Presidenti Bush. Gjeniu, i cili edhe pse ishte vetëm një mandat në Shtëpinë e Bardhë, ideoi diplomacinë amerikane për disa dekada; Dhe, President në kohën e sfidave më të mëdha botërore, kur rendi i ri botërorë nuk erdhi por shpërtheu.

George Herbert Walker Bush ishte President i SHBA kur ra Muri i Berlinit, u shpërbë BRSS, u rrëzua presidenti Panamasë Manuel Noriega, shpëtoi presidentja filipineze Corazon Aquino, Saddam Hyseinin u detyrua të largohet nga Kuvajti i pushtuar, si dhe i tregoi Sllobodan Millosheviçit vijën e kuqe.

Edhe pse diplomacia e Presidentit Bush bëri që me rënien e murit të Berlinit dhe shpërbërjes së Bashkimit Sovjetik, SHBA të bëhet superfuqia më e madhe botërore, as ndërhyrja për ta rrëzuar me parashutistët amerikan Noriegën, as ndihma që i tha presidentes Aquino pas puçit dhe as ndërhyrja në Ish-Jugosllavi me Presidentin Sllobodan Millosheviç që po përgjakte Ballkanin nuk e bënë njeriun më të dashur në Shtetet e Bashkuara siç e bëri Lufta e Gjirit, me përfundimin e së cilës ai arriti popullaritetin ndër amerikanë  plotë 90 %.

Por George H.W.Bush nuk ndryshoi. Ishte po ai i vitit 1988 kur pranoi nominimn për President dhe përballë kishte Ronald Reganinin e fuqishëm dhe të dashur ndër republikanë.

“Më lexoni nga buzët!” Ky ishte mesazhi në Konventën Kombëtare të Partisë Republikane, dhe fitorja e tij jo vetëm brenda partisë por edhe në garën presidenciale ishte spektakolare.

Humbja e tij përballë demokratit Bill Clinton u konsiderua si humbje për shkak të rritjes së tatimit për uljen e defiçitit buxhetor, gjë që kishte zemëruar konservatoët, ndërkohë qëndrimet e tij mbi tatimet kishin nxitur miliarderin nga Texasi, Ross Perot se mund të fitoj edhe si kandidat i pavarur.

Por, analizat zgjedhore që pasuan pas kësaj humbje theksojnë se George H.W. Bush kishte humbur përballë Bill Clintonit sepse nuk kishte pranuar të përdor në fushatën zgjedhore Luftën e Gjirit, me asnjë çmim.

Pse?! Thjeshtë, ky ishte George Herbert Walker Bush, që luftimin e një diktatori si Saddam Hysein e quante detyrim dhe përdorimi i popullaritetit të krijuar pas Luftës së Gjirit për të ishte i papranueshëm!

Për çfarë do ta kujtojnë shqiptarët! Pritja që i bëri presidentit të parë të Shqipërisë pluraliste, Sali Berisha, vizita në Vlorë dhe padyshim ndërhyrja në aventurën e Sllobodan Millosheviçit janë momente historike që kanë lënë gjurmë në mbijetesën dhe zhvillimin e kombit shqiptar.

Në kohën kur Presidenti George H.W.Bush pranoi në Zyrën Ovale, Sali Berishën, Shtetet e Bashkuara ishin superfuqia më e madhe në botë me Kinën në zhvillim e sipër, Bashkimin Sovjetik të shpërbërë dhe Gjermaninë e sapobashkuar.

Mesazhin që i dha kriminelit Sllobodan Millosheviç në prag të krishtlindjeve të vitit 1992 kur po planifikonte të hapte front lufte edhe me Kosovën ndërkohë që po luftonte me forcat e tij kriminale në Kroaci dhe Bosnje, nuk ishte thjeshtë një mesazh kërcënimi. Ky mesazh vinte nga Presidenti i një shteti që dy vite më parë kishte gjunjëzuar mikun e Sllobodan Millosheviçit, diktatorin Saddam Hysein i cili me pushtimin e Kuvajtit, kishte vepruar pikërisht ashtu siç e mendonte Millosheviç  Jugosllavinë, nën Serbi.

Nuk dihet se cila do të ishte Kosova sot pa George H.W. Bush, por mesazhi i tij drejtuar Presidentit të Serbisë, Sllobodan Millosheviç, dhe komandantit të Ushtrisë Jugosllave, Gjeneralit Zhivota Paniç, ishte i qartë se Millosheviç nuk mund ta pushtoj Jugosllavinë, aq më pak Kosovën:

“Në rast të konfliktit në Kosovë të shkaktuar nga veprimi serb, Shtetet e Bashkuara do të jenë të përgatitur të përdorin forcën ushtarake kundër serbëve në Kosovë dhe në Serbi!”

Sot Kosova është në zi sepse humbi një mik të madh, humbi mikun e lirisë shqiptare dhe jo vetëm.

Prehu në paqe miku i lirisë dhe i gjithë shqiptarëve.

Lamtumirë President George Herbert Walker Bush!