Lamtumirë President Bujar Nishani!
Sot u nda nga ne përgjithmonë Presidenti i nderuar i Republikës, Bujar Nishani!
Ndërsa kortezhi me trupin e tij të pajetë u nis drejt banesës së fundit, para syve të çdo shqiptari shfaqet karriera e tij intensive me shumë sfida, që krijoi ndër ta dhe figurën e një Presidenti fisnik që respekton atdheun dhe institucionet e tij, duke mos harruar për asnjë çast Kosovën, shqiptarët në Maqedoni, Luginën e Preshevës, Mal të Zi dhe jo vetëm!
Njeriu që veproi dhe guxoi, Bujar Nishani ishte edhe atëherë kur duhej nderuar heronjtë që luftuan komunizmin dhe e bëri atë me “Kompaninë 4000” duke e dekoruar me çmimin më të lartë “Gjergj Kastrioti Skënderbeu”.
Për Masakrën komuniste të Matjanit në Lushnje shumë pak persona guxuan të flasin por Presidenti Bujar Nishani i nderoi viktimat e kësaj masakre!
Nuk duhet harruar nderimin që i bëri dhe Mbretëreshës së këngës shqipe, Nexhmije Pagarusha. Kur i kërkova nënshtesinë e munguar për të, u çudit, më shikoi me habi dhe më pyeti:
-Si është e mundur që ajo të mosketë nënshtetësi shqiptare, më tha Presidenti Nishani duke ju kujtuar se ajo ishte dekoruar edhe me titullin “Nderi i Kombit”.
-Ja që nuk është shqiptare, i thashë me buzë në gaz, duke i rrëfyer premtimet pa fund që i kishin bërë, dhe sot në moshë të thyer i duhet një pasaportë për të lëvizur të paktën deri në Zvicër ku kishte mbesën e saj të dashur!
Pa diskutim që Mbretëresha e këngës shqipe, Nexhmije Pagarusha, u bë shumë shpejt me pashaportë shqiptare, për të cilin nder sa herë që takoheshim me Presidentin Bujar Nishani e falënderoja dhe po aq herë më thoshte që “e kishte për nder”!
Dhe, në momentin kur u shua Mbretëresha e kënëgs shqipe nuk mungoi dhe ngushëllimi nga Presidenti i saj më i dashur shqiptar:
“Ngushëllime për divën shqiptare!”
Sot u panë në homazhe që shqiptarët mos të harrojnë dhe dekorimin e Shoqatës Kulturore Atdhetare “Labëria” me Dekoratën “Nderi i Kombit”. Ata të cilët në ditën e shpalljes së pavarësisë së Kosovës, erdhën në 17 Shkurtin e ftohtë të vitit 2008 për ti kënduar Adem Jasharit, për të cilin qeveritarët e sotëm nuk duan t’ia dijnë, për të mos i prishur punë me “Ballkanin e Hapur” e Presidentit të Serbisë, Aleksandar Vuçiç.
Projekt për të cilin shumë kohë më parë Presidenti Bujar Nishani u shprehë qartë se është i mbrapsht, antieuropian dhe antiperëndimor. “Thjeshtë nuk mund ta pranojmë rikthimin e hegjemonisë serbe në rajon që i ka kushtuar shumë paqes dhe rajonit.”
Dhe, nuk do ta pranojmë rikthimin e hegjemonisë serbe i nderuar President, për këtë me lotë në sy tu betua dhe Policia e Kosovës, kur trupi juaj i pajetë po kalonte kufirin shqiptaro-shqiptar për të mos u kthyer më kurrë nga atdheu!
Këto dhe shumë vendime të tjera dëshmojnë fisnikërinë e një njeriu që shqiptarët e patën për fat ta kishin President të Republikës, ashtu siç thoshte dhe i madhi Albert Camus:
“Madhështia e njeriut është në vendimin e tij që të jetë më i fortë se fati i tij!”
Lamtumirë President Bujar Nishani!
