Largimi i Agron Tufës, Presidenti Meta: Më tronditës mosreagimi i asnjë institucioni!

Presidenti i Republikës, Ilir Meta, tha sot se largimi i shkrimtarit Agron Tufa nga vendi pas kërcënimit familjarisht për shkak të detyrës dhe mendimeve të tij të shprehura publikisht, ishte një nga lajmet më tronditëse por më tronditëse ishte mosreagimi i asnjë institucioni për ngjarjen.

“Ishte një lajm tronditës largimi i Agron Tufës, një shkrimtar i njohur dhe ish-drejtues i Institutit të Studimeve për Krimet dhe Pasojat e Komunizmit i cili u kërcënua familjarisht për shkak të detyrës dhe mendimeve të tij të shprehura publikisht. Ishte dhe më tronditës moreagimi i asnjë institucioni ndaj kësaj ngjarje apo të tjerave të ngjashme ku zyrtarë të ndryshëm gjenden para kërcënimeve të hapura publike dhe nuk reagon askush,” tha Ilir Meta në Konferencën “Liri pa urrejtje, liria e shprehjes përballë të drejtave të tjera të njeriut” organizuar nga Zyra e Avokatit të Popullit, duke konstatuar edhe përkeqësimin e lirisë së medias ndërsa bëri thirrje që kufizimet ndaj gjuhës së urrejtjes të mos keqpërdoren me qëllim mbytjen e kriktikës ndaj qeverisjes dhe të zgjedhurve, të bindjeve të ndryshme politike, të përkatësisë së besimit fetar apo të kërkesës për llogaridhënie.

Ndryshe, Ish-Drejtori i Institutit për Studime të Krimeve të Komunizmit Agron Tufa kërkoi azil politik në një vend europian për shkak të kërcënimeve në detyrë.