Largimi i Qeveris së krimit/ Çelësi i fitores, Basha: Unitet dhe Qëndresë nga 16 Marsi

Duke konstatuar premtimet e pambajtura të Edi Ramës i cili pushtetin e ka lidhur me ndihmën e kriminelëve dhe oligarkëve që vjedhin nga mëngjesi deri në darkë ndërsa populli varfërohet, kryetari i Partisë Demokratike, Lulzim Basha, para banorëve të Paskuqanit tha se kësaj gjendjeje, shqiptarët kanë vendosur t’i japin fund.

“Ndryshimi që ne kërkojmë për Shqipërinë është i njëjtë si ndryshimi që ju doni për familjet tuaja. Ju doni që kryefamiljarët të mbajnë përgjegjësi para fëmijëve, para familjarëve dhe ne duam që së bashku të kemi një qeveri që mban përgjegjësi para njerëzve, një kryeministër që po nuk i mbajti premtimet, largohet. Një kryeministër dhe një qeveri që të kujdeset për më të pamundurit dhe të ketë objektiv numër 1: mirëqenien dhe punësimin e njerëzve.”

Shqipëria i ka mundësitë të zhvillohet e të krijojë mirëqenie, tha Lulzim Basha, dhe për këtë duhet barazi para ligjit, për këtë duhet që qeveria të ketë frikë popullin dhe jo populli qeverinë. Për këtë duhet që për ato vlera europiane për të cilat ikin shqiptarët drejt Europës, të fillojmë t’i ndërtojmë këtu në vendin tonë.

“Ju e keni në dorë çelësin e këtij ndryshimi. Ju e keni në dorë të keni një qeveri që ditën e parë ta ulë çmimin e naftës me 300 lek. Ky është zotimi i Partisë Demokratike, ky është plani ekonomik. Ju e keni në dorë të keni një qeveri që të ulë çmimin e energjisë dhe që familjet në ndihmë ekonomike t’i kenë falas 300 kilovatët e parë. Ju e keni në dorë të keni një qeveri të ulë taksat dhe të lërë bizneset, sipërmarrësit të punojnë dhe të krijojnë vende pune, vende pune me paga dinjitoze, vende pune me mundësi për gjithë shqiptarët dhe në veçanti për rininë,” tha Basha duke vlerësuar se pengesa e vetme për këto dhe për shumë masa të tjera që do të lehtësojnë jetën, do të hapin vende pune, do të ulin taksat, pengesa e vetme për Shqipërinë europiane është një njeri që ka humbur çdo lidhje me realitetin, Edi Rama.

“Rruga që ne kemi përcaktuar, do ta nxjerrë Shqipërinë nga kjo krizë. Por, kjo rrugë kërkon që të jemi të gjithë bashkë. Kjo rrugë kërkon që të jemi të gjithë të vendosur për ta çuar deri në fund. Shpresa e vetme e Edi Ramës për të vazhduar për të qëndruar në pushtet, në këtë pushtet që e ka blerë me lekët e krimit, është t’i përçajë shqiptarët e t’i lodhë shqiptarët,” tha lideri i Opozitës para banorëve të Paskuqanit dhe kur mori konfirmimin nga ata se nuk janë lodhur nga kjo betejë me pushtetin kriminal dhe janë të bashkuar, shtoi se mrekullia e bashkimit të shqiptarëve, nuk është thjesht forca që kemi demonstruar, por është shpresa që kemi ndezur në shpirtin e çdo shqiptari për një ndryshim të vërtetë që po vjen.  

Ndaj, i ftoj ta vazhdojnë këtë marshim të gjithë bashkë më 16 mars, sot një javë, të shtunën, në sheshin e protestës, për të larguar këtë qeveri të krimit, për t’i dhënë vendit një qeveri tranzitore, zgjedhje të lira dhe të ndershme dhe një parlament nga populli, për popullin dhe të popullit.

“Bashkë e kemi në dorë ta ndryshojmë këtë vend. Bashkë jemi shumica. Të djathtë e të majtë. Ndajmë të njëjtat halle, të njëjtat ëndrra për fëmijët dhe rininë.Të gjithë duam t’i japim fund emigracionit. Ne duam që fëmijët tanë ta ndërtojnë jetën e tyre këtu në Shqipëri.”

Madje duam që edhe ata që kanë ikur, të kenë mundësi të kthehen e të bashkohen me familjet e tyre, sepse Shqipëria i ka mundësitë, sepse Shqipëria nuk është një vend i varfër, por është një vend i vjedhur, vlerësoi kryetari i Partisë Demokratike, duke përsëritur se Shqipërinë e vjedh qeveria, Shqipërinë e vjedh Edi Rama, Shqipërinë e vjedhin oligarkët grabitqarë.

“Kësaj do t’i japim fund! Në rrugën tonë nuk ka asnjë hap pas, ndaj ju kërkoj të jemi të gjithë bashkë me 16 mars dhe të vazhdojmë betejën tonë deri në fitore. Fitore që do t’i takojë qytetarëve shqiptarë.”

Kjo nuk bëhet për pushtet, por bëhet për ndryshim, tha kryetari i Partisë Demokratike, Lulzim Basha, duke shtuar:

“Kjo betejë nuk bëhet për pushtetin tim, nuk bëhet për pushtetin e një partie politike, bëhet për ndryshim dhe ndryshimi do të vijë kur pushtetin një orë e më parë, një herë e mirë, ta keni në orë ju, qytetarë fisnikë, punëtorë të lirë të këtij vendi,” ndërsa përfundoi: “Në Paskuqan ka më pak njerëz me ndihmë ekonomike sesa në Bllok, që është një shenjë e qartë e korrupsionit të Edi Ramës dhe i diskriminimit që i ka bërë kësaj zone. Por, të jeni të sigurt, se kur t’i bashkojmë forcat me pushtetin lokal, pushtetin qendror, me një qeveri që do t’ju përgjigjet për hallet tuaja, ndryshimi pozitiv për çdo familje do të ndjehet kudo, por për këtë së pari duhet të fitojmë betejën. Që të fitojmë betejën, na duhet vetëm një gjë. Unitet, pjesëmarrje, qëndresë, duke filluar me 16 marsin, sot një javë, në sheshin përpara Kryeministrisë.”