Largohet barrikada në Merdare, digjen disa kamionë në një barrikadë në veri
Mëngjesin e sotëm është larguar barrikada në anën e Serbisë në Merdare, ndërkohë raportohet se disa kamionë, me të cilët ishte bllokuar rruga në lokacionin e njohur si Shkëmbi i Dudës në Mitrovicë të Veriut, janë djegur gjatë natës.
Policia e Kosovës ka njoftuar se në mëngjesin e hershëm të së enjtes “është raportuar se në lokacionin e quajtur Shkëmbi i Dudës në Mitrovicën e Veriut janë djegur dy mjete të rënda (kamionë), të cilët kanë qenë të vendosur në barrikadë”.
Sipas Policisë së Kosovës, raporton RFE, përveç dëmeve materiale, nuk raportohet për persona të lënduar, përderisa rasti është duke u hetuar.
Këta kamionë ishin vendosur në këtë vend më 27 dhjetor, kur grupe të serbëve vendosën barrikada të reja në rrugët e veriut.
Djegia e këtyre kamionëve ndodhi pikërisht në ditën kur pritet të largohen barrikadat pas 20 ditësh bllokimi të rrugëve në katër komunat në veri: Mitrovicë e Veriut, Zveçan, Zubin Potok dhe Leposaviç.
Ndërkohë mëngjesin e sotëm është larguar barrikada e parë serbe që ishte vendosur në anën e Serbisë, dy kilometra larg pikës kufitare në Merdare, raporton ekipi i RFE që ndodhet në vendin e ngjarjes.
Lirimin e rrugës e ka konfirmuar edhe Policia e Kosovës.
Në një komunikatë për media, Policia e Kosovës tha se “rruga e cila ishte bllokuar me 27.12.2022 në kilometrin e dytë brenda në Serbi, sot në ora 09:50 është liruar për qarkullim”.
Policia njoftoi “qytetarët dhe bashkatdhetarët se tani pikëkalimi kufitar “Merdare”, është liruar për qarkullim dhe i është kthyer normalitetit të plotë”.
Personat që ishin të pranishëm në këtë vend ku ishte bllokuar rruga, thanë për REL-in se ishin pjesërisht të kënaqur me marrëveshjen e arritur mbrëmjen e së mërkurës.
Ata theksuan se po veprojnë në koordinim me pjesëtarët e komunitetit serb nga Kosova.
Më 27 dhjetor, pika kufitare në Merdare u mbyll nga Policia e Kosovës pasi një grup serbësh në Serbi kanë bllokuar rrugën për në kufi.
Lajmi për largimin e barrikadave, raporton RFE, u bë i ditur mbrëmjen e 28 dhjetorit, pasi presidenti i Serbisë, Aleksandar Vuçiq, takoi përfaqësuesit e serbëve të Kosovës.
Largimi i barrikadave ishte kushtëzuar me lirimin nga paraburgimi të ish-policit të Kosovës, Dejan Pantiq, i cili u arrestua për dyshimet se kishte organizuar sulmin e kryer ndaj zyrave të Komisionit Qendror të Kosovës në pjesën veriore në fillim të muajit dhjetor.
Pantiq u lirua dje nga paraburgimi pasi iu zëvendësua masa me atë të arrestit shtëpiak.
Në një protestë që u zhvillua në fshatin Rudarë të Zveçanit, përfaqësuesit politikë të serbëve të Kosovës vendosën edhe kushte të tjera për heqjen e barrikadave përfshirë formimin e Asociacionit të komunave me shumicë serbe.
