Largohu deri më 15 shkurt/ Basha në Durrës: Edi Rama, më 16 Shkurt populli do të shkulë nga ajo karrige

Kryetari i Partisë Demokratike, Lulzim Basha, nga Durrësi i bëri thirrje kryeministrit Edi Rama që të largohet deri më 15 shkurt ndryshe më 16 shkurt, populli do ta shkulë nga ajo karrige.

“Jam këtu t’u jap fjalën se Partia Demokratike dhe Lulzim Basha do t’ju dalë zot dhe do të bëjmë çmos t’i plotësojmë kushtet rinisë studentore dhe pedagogëve tuaj,” tha Lulzim Basha para të rinjëve durrsakë ku i njohu me pikat kyçe të platformësë së PD, në bashkëpunim me ekspertët gjermanë të CDU-së, për rritjen e cilësisë së mësimdhënies në universitete dhe lidhjen e të rinjve me tregun e punës: trajnimin gjatë studimeve dhe stazhin një vjeçar menjëherë pas studimeve, që të dyja të financuara nga buxheti i shtetit.

Me këtë rast, lideri i opozitës i ftoi studentët t’i bashkohen protestës në Tiranë më 16 shkurt për t’i dhënë së bashku një goditje përfundimtare sistemit të antivlerave. 

“Liria, mundësia dhe punësimi kanë një armik, por disa fytyra. Në Tiranë kanë fytyrën e Edi Ramës, kurse në Durrës kanë fytyrën e Vangjush Dakos. Janë ata që në vend që të promovojnë të mirët dhe të zotët, i kanë mbyllur dyert e shtetit për aftësinë e për talentin dhe i kanë hapur ato për vesin, për paaftësinë, për hajdutët dhe për kriminelët,” tha Basha në takimin me të rinjtë ndërsa mesazhin kryesor në prag të Protestës së Madhe e dha para Bashkisë së Durrësit, pas një pritje madhështore nga qytetarët:

“Nga ky shesh dhe nga kjo ndërtesë e juaja që pret të çlirohet shumë shpejt, le t’i jap këtë mesazh edhe në emrin tuaj: Edi Rama, largohu deri më datën 15 sepse më 16 populli do të të shkulë nga ajo karrige. Prokurori shqiptare, arresto Vangjush Dakon, përndryshe, më 16 prangat do t’ia vënë qytetarët,” tha kryetari i PD, Lulzim Basha duke e konsideruar këtë si preludi i protestës madhështore të 16 shkurtit në Tiranë.