Lavrov: Objektivat e Moskës në Ukrainë shkojnë përtej Donbasit

Ministri i Jashtëm rus, Sergei Lavrov, tha se objektivat gjeografike të operacionit special ushtarak të Rusisë në Ukrainë, nuk kufizohen vetëm në rajonet lindore Donjeck dhe Luhansk, të njohura bashkërisht si Donbas.

“Tani gjeografia është ndryshe. Dhe nuk është vetëm Donbasi, por edhe rajonet Herson, Zaporizhja dhe një numër territoresh tjera. Procesi vazhdon me këmbëngulje,” tha sot Lavrov për Agjencitë ruse të lajmeve, RIA Novosti dhe RT.

Lavrov ka shtuar se “nëse Perëndimi dërgon armë me rreze të gjatë në Kiev, synimet gjeografike të operacionit special në Ukrainë do të zgjerohen edhe më shumë”.

Shtëpia e Bardhë ka thënë më 19 korrik se Rusia po përgatitet që të aneksojë më shumë territor ukrainas dhe po instalon liderë “të paligjshëm” në zonat që ka nën kontroll.

John Kirby, zëdhënës i Këshillit të Sigurisë Kombëtare, ka thënë nga Shtëpia e Bardhë se Rusia po planifikon që të organizojë “referendume të rreme” në zonat që ka pushtuar më së afërmi në shtator.

Sipas tij, raporton RFE, Moska po përgatitet që rubla ruse të përdoret si monedhë dhe t’i detyrojë banorët që të aplikojnë për shtetësi.

Ndryshe, Presidenti i Rusisë, Vladimir Putin, ka urdhëruar pushtimin e Ukrainës më 24 shkurt. Ai e quan luftën si “operacion special ushtarak” për të çmilitarizuar Ukrainën. Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.