LDK humb Podujevën, Vetëvendosje rrëzon perandorinë e Agim Veliut

Akuzat për manipulim në zgjedhjet e kaluara lokale nga Agim Veliu u konfirmuan, sot kur LDK pësoi humbje të thellë nga Lëvizja Vetëvendosje në zgjedhjet e jashtëzakonshme në Podujevë.

Kështu, sipas rezultateve paraprake të Komisionit Qendror të Zgjedhjeve, të cilat u shpallën nga Kryetarja Valdete Daka, Shpejtim Bulliqi i Lëvizjes Vetëvendosje fitoi 51.64 për qind, Nexhmi Rudari i LDK fitoi 35.97 për qind ndërsa Naim Fetahu i PDK fitoi 12.40 për qind.

Ndërsa në Mitrovicën Veriore Lista Serbe ka fituar 89.86 për qind të votave, Lëvizja Vetëvendosje me kandidatin Erden Atiq ka fituar 3.68 për qind, PDK me Florent Azemin ka 3.54 për qind dhe një kandidat i pavarur ka arritur 2.92 për qind të votave.

Ndryshe, për LDK kjo është humbja e parë në Podujevë në Kosovën e pasluftës.

Zgjedhjet e jashtëzakonshme në Podujevë dhe Mitrovicë të Veriut u zhvilluan pasi kryetarët e këtyre komunave u emëruan në Qeverinë e Avdullah Hotit, Agim Veliu Ministër i Brendshëm, dhe Goran Rakiç, Zv/Kryeministër dhe Ministër i Pushtetit Lokal.