LDK i përgjigjet Thaçit: Kryesuesin e dialogut me Serbinë e vendosin qytetarët në zgjedhje!

Lidhja Demokratike e Kosovës, LDK, i ka dhënë përgjigje Presidentit Thaçi pas “ofertës” që i bëri për kryesimin e dialogut me Serbinë:

“Qytetarët e Kosovës, përmes zgjedhjeve të lira, do të vendosin se kush do ta udhëheq dialogun me Serbinë,: tha shefii Grupit parlamentar të LDK, Avdullah Hoti duke shtuar se tashmë është e qartë që tani se ai person nuk do të jetë z.Thaçi, pasi ai në bazë të Kushtetutës së Kosovës nuk ka mandat të vendos për këto çështje.

“Deklarimet e tij janë në kundërshtim me Kushtetutën e Kosovës. Në vend që të jetë garant i rendit kushtetues të Republikës së Kosovës, ai është duke e cenuar çdo ditë atë dhe për këtë duhet të flasë Gjykata Kushtetuese. Dëmet që z.Thaçi me deklarimet e tij antikushtetuese është duke ia bërë shtetësisë së Kosovës në arenën ndërkombëtare janë të mëdha.”

Shefi i Grupit parlamentar të LDK, Avdullah Hoti duke theksuar se qytetarët e Kosovës e kanë vendosur fatin e Kosovës si shtet i pavarur, i integruar në BE dhe NATO dhe në miqësi të përhershme me SHBA, përfundon:

“Këtë nuk mund ta zhbëjë askush!”