LDK: Suksesin e garanton koordinimi me aleatët tanë, SHBA dhe BE

Pas dështimit të sotëm për arritjen e një marrëveshje për targat në Bruksel, ka reaguar Lidhja Demokratike e Kosovës, LDK, e cila kërkon nga Qeveria e Kosovës, që në asnjë rast, të mos sillet në atë mënyrë që Serbia të duket mirë dhe të fajësohet Kosova siç ndodhi sot.

“Kosovës i duhen aleatët e saj, përkrahës historik të popullit të Kosovës. Kush i dëmton raportet me aleatët, rrezikon ta lë vendin tonë pa përkrahje. Kosova ka arritur deri këtu bashkë me aleatët dhe kështu duhet të vazhdojë edhe më tutje,” thuhet në reagimin e LDK-së duke shtuar se ajo po ndjek me shumë kujdes situatën e krijuar pas dështimit të sotëm, në Bruksel, të përpjekjeve për të gjetur një zgjidhje ndërmjet Kosovës dhe Serbisë, me ndërmjetësimin e BE-së.

“LDK-ja vlerëson se stabiliteti dhe siguria janë kushte thelbësore për të arritur progres, si dhe për të ushtruar sovranitetin në gjithë territorin e saj. Shtrirja e ligjshmërisë në gjithë territorin është e drejtë e pamohueshme e Kosovës. Suksesin e garanton koordimi me aleatët tanë, SHBA dhe BE”, thuhet në komunikatën e LDK-së.

Ndërsa Partia Demokratike të Kosovës, duke reaguar përmes nën kryetares, Vlora Çitaku, shprehet se sovraniteti është i rëndësishëm, por edhe aleancat,.

“Si kaluam nga diskutimi për normalizimin dhe njohjen reciproke, në grindjet e vogla për targat?! Sovraniteti është i rëndësishëm, por edhe aleancat, SHBA dhe BE,” thekson Vlora Çitaku në reagimin e saj përmes rrjetit social Twitter.

Ndërsa Kryetari i Aleancës për Ardhmërinë e Kosovës, Ramush Haradinaj, shkoi një hap më tutje duke i bërë thirr kryeministrit Albin Kurti që ta pezullojë zbatimin e vendimit për targat deri në arritjen e marrëveshjes për njohje të ndërsjellë, ndërsa nga kryeparlamentari kërko seancë urgjente në Parlament.

“I bëj thirrje kryetarit të Kuvendit që urgjentisht ta thërras Parlamentin në seancë të jashtëzakonshme, që të miratohet Rezoluta e propozuar prej AAK, për tejkalimin e situatës së krijuar. Po ashtu i kërkoj Presidentes të marrë rol aktiv në qetësimin e situatës dhe në kapërcimin e ngërçit të krijuar,” shprehet Haradinaj në reagimin e tij përmes rrjetit social Facebook ndërsa i bën tirrje edhe qytetarëve serbë që të përmbahen nga aktet e dhunës dhe të mos bien pre e kalkulimeve politike të regjimit në Beograd.

“Është momenti i fundit që qeveritë në Beograd e në Prishtinë, të ulen e të bien në ujdi për marrëveshjen e paqes për njohje, e të heqin dorë nga veprimet që rrezikojnë jetët e njerëzve.”

Ndryshe, pas shpalljes së negociatave të dështuara nga shefi i diplomacisë evropiane, Josep Borrell, Kryeministri Albin Kurti u shpreh se propozimi i BE-së, që Kosova të mos fillojë me shqiptimin e gjobave dhe Serbia të mos lëshojë targa të reja për serbët e Kosovës, është i papranueshëm nëse nuk shoqërohet me dakordimin që me urgjencë të angazhohemi për marrëveshje finale për normalizim të plotë të marrëdhënieve.

“Në propozimin që na e kanë sjellë më herët zotërinjtë Borrell dhe i dërguari i BE-së për dialogun, Mirosllav Lajçak për deklaratën e përbashkët, madje ka qenë edhe afati i marsit të vitit 2023. Pra, që ne po vijmë këtu në Bruksel për t’u marrë vesh drejt një ecjeje të re, për marrëveshje që arrihet para marsit të vitit 2023”, tha Albin Kurti duke saktësuar se Borrell hoqi dorë nga ky afat dhe nga propozimi i BE-së për normalizimin e marrëdhënieve ndërmjet Kosovës dhe Serbisë.