LDK-VV, Mustafa: Kryeministri vetëm LDK-së, ndryshe s’ka koalicion

Kryetari i Lidhjes Demokratike të Kosovës, Isa Mustafa, tha se ende nuk kanë arritur ndonjë Marrëveshje me Lëvizjen Vetëvendosje lidhur me koalicionin parazgjedhor mes dy partive.

Duke u bazuar në bisedat që janë zhvilluar deri më tani, nuk ka zgjidhje tjetër, përveç se të konkurrojmë veç e veç.

Mustafa tha se nuk do të hyjnë në koalicion me asnjë parti tjetër, përveç Vetëvendosjes por posti i kryeministrit po e zvarritë këtë çështje dhe po pamundëson marrëveshjen.

“Kanë mbetur që ata të japin reflektimin lidhur me këtë. Akoma nuk kemi ndonjë përgjigje. Natyrisht ne jemi të përcaktuar që koalicioni do të jetë i mundshëm për të cilin vlerësojmë që është i mirë të bëhet sepse kemi objektiva të përbashkëta, forcimin e shtetit, zhvillimin ekonomik, dekriminalizimin. Porse LDK do ta këtë kryeministrin, dhe ne kështu besojmë se mund të arrihet një program për të cilin jemi të përkushtuar.”

Ndryshe, Kryetari i LDK foli edhe për zgjidhjen që deri më tani po shihet si zgjidhja e vetme:

“Çdo zgjidhje tjetër na qon në atë që të konkurrojmë veç e veç. Pas procesit zgjedhor, pas datës 6 tetor duhet të merremi vesh që Qeverinë duhet të drejtojë ai që ka shumicën e votave. Nuk kemi ndonjë çështje që nuk jemi pajtuar. Posti i Kryeministrit po e zvarritë këtë proces dhe ndoshta pamundëson marrëveshjen. Nuk hyjmë në koalicion më asnjë subjekt tjetër, pos Vetëvendosjes. Nëse bëjmë vetëm me Vetëvendosjen,” ishte i prerë Isa Mustafa.