Lebet: S’është normale ne ta financojmë ujësjellësin, e ju veteranët e rrejshëm!

Ambasadori i Zvicrës në Kosovë, Jean-Hubert Lebet, në përurimin e ujësjellësit në disa fshatra të Skenderajt, tha se nuk është normale që qeveria e tij të financojë projekte të tilla sepse Kosova ka para, por nuk duhet keqpërdorur. Nuk duhet paguar veteranët e rrejshëm, tha ai, e pastaj të tjerët të investojnë në projekte qenësore për qytetarët.

Nga Skenderaj ai foli edhe për shërbyesit civil në Kosovë, ku tha se numri i tyre është tri herë më i madh se në vendet e rajonit.

Ambasadori Lebet, me rastin e përurimit të ujësjellësit në disa fshatra të Skenderajt, tha se vlera e projektit të ujësjellësit kushton 2.5 përqind e vlerës së ndarë për pensionet e veteranëve, ku tha se ka shumë veteranë të rrejshëm që marrin pensione pa meritë.

“Nuk është normale që qeveria e Zvicrës të financojë ujësjellësin këtu, sepse e dimë që ekzistojnë të holla edhe në këtë vend. E dimë se vlera e këtij projekti është përafërsisht 2.5 përqind e vlerës për veteranët e luftës. Por, veteranët e vërtetë të cilët kanë luftuar për lirinë e këtij vendi. Nuk jemi të lumtur të shohim nëse njerëzit marrin këtë status pa ndonjë të drejtë. Do të thotë, nëse të hollat ruhen jo për të financuar veteranët e rrejshëm do të ndërtojmë shumë më shumë sisteme të ujësjellësit. Është shumë irituese të shohim në këtë vend ku ka më shumë shërbyes civil tri herë më tepër sesa në vendet e rajonit. Mjaft është bërë për të përmirësuar administratën publike, mirëpo ende duhet të punohet në ketë drejtim”, tha ai.

Ndaj deklaratës së ambasadorit i ka reaguar kryetari i Parlamentit të Kosovës, Kadri Veseli, i cili tha se në vendin ku po përurohet ujësjellësi, ka shumë luftëtarë të vërtetë, të cilët kanë qenë në UÇK.

“Këtu ku sot do të bëhet përurimi i këtij investimi i cili është shumë i madh, i nderuari ambasador ka pasur luftëtarë të cilët kanë qenë vetëm luftëtarë të vërtetë të UÇK-së. Ka shumë heronj kjo zonë, por ka edhe njerëz të cilët japin kontribut edhe sot paqes“, tha Kadri Veseli.

Kryetari i Skenderajt, Bekim Jashari, tha se nga ky sistem i ujësjellësit do të përfitojnë 10 mijë banorë, nga 10 fshatra të Skenderaj, përfshirë Çubrelin, Kllodernicën, Kopiliqin e Epërm, Kopiliqin e Poshtëm, Kostërcin, Rakinicën, Turiqecin, Tushilën, Vajnikun dhe një pjesë të fshatit Kërnicë.

Ky projekt kap vlerën prej 1 milion e 230 mijë euro.

Bekim Jashari tha se shumë shpejt do të nisë projekti tjetër i ngjashëm, faza e VI, me të njëjtit donatorë, nga i cili do të përfitojnë fshatrat: Açarevë, Abri e Poshtme, Likoc, Llaushë, Makërmal, Marinë, Murgë, Plluzhinë, Rezallë, Ticë e Izbicë.