Lehtësimi i masave, fluks në kufirin e Vërmicës
Pas lehtësimit të masave për lëvizjen e qytetarëve në pikën kufitare në Vërmicë është parë një numër i madh i qytetarëve që po lëviznin nga Shqipëria në Kosovë.
Ndonëse shumë prej tyre nuk po respektonin masat mbrojtëse si mbajtja e maskave, ata vetëm iu nënshtruan kontrolleve mjekësore ku edhe iu morën të dhënat e tyre personale.
Mosrespektim të distancës pati edhe tek radha e qytetarëve që prisnin për t’u kontrolluar.
Andi Nilo thotë se ka pritur dy orë për të hyrë në Kosovë. Derisa tregon për kontrollet mjekësore të cilave iu nënshtrua, ai ankohet se nuk patë shenjëzime për mbajtje të distancës sociale që po rekomandohet si masë parandaluese ndaj COVID19.
“Po matëm temperaturën, thanë mbajë distancën por nuk ka as shenja se sa duhet të rrimë. Kështu me fol gjithçka por me vepra asgjë nuk po bëhet…dy orë”, tha ky qytetar.
Nga Shqipëria drejt Kosovës sot kishte marr rrugë edhe Ermidon Agaj i cili thotë se nuk i frikësohet shtimit të rasteve të reja me koronavirus në Kosovë.
“Pati pak (kolonë) po ia vlen… po u kontrolluam na i morën numrat e telefonit”, tregoi për procedurat në të cilat kaloi Agaj.
Ndriqim Ngadica sot me lehtësimin e masave ka zgjedhur të vijë për vizitë në Prizenin.
Ai thotë se kreu kontrollet mjekësore dhe konform kërkesave, dha të dhënat e tij personale.
“Vetëm me e pa sepse jetoj në kurbet, me pa Prizrenin e për t’u kthyer… dokumentet normale si kartën e identitetit, emrin, mbiemrin dhe u kontrolluam këtu”, tha ai.
Ndryshe, Qeveria e Kosovës ka marrë vendim që duke filluar prej sot qytetarët që hyjnë në Kosovë të mos i nënshtrohen masës së vetizolimit shtëpiak për një javë. Në vend të testimit të obliguar për CODID-19, për ata që hyjnë, do të jetë masa e kontrollit nga ekipet mjekësore të QKMF-ve të vendosura në pikat kufitare apo në QKMF-të brenda komunave.
Me këtë rast, ministri i Shëndetësisë Armend Zemaj, drejtori i IKSHPK-së, Naser Ramadani, ushtruesja e detyrës së kryeinspektores shëndetësore Nora Krasniqi dhe kryeinspektori i AUVK, Ibrahim Tërshnajku do të vizitojnë sot pikën kufitare në Vërmicë, për të parë implementimin e masave të reja për COVID-19.
Masat për kufizimin e qarkullimit të qytetarëve dhe mallrave me shtetet e rajonit hynë në fuqi më 13 mars, kur u paraqitën rastet e para me COVID-19 në Kosovë.
