Lehtësimi i masave, Kurti: S’ka lidhje me organizimin e protestës!

Kryeministri në detyrë i Kosovës, Albin Kurti, tha se lehtësimi i masave të lëvizjes nuk është i ndërlidhur me mundësinë e organizimit të protestës këtë javë, pas vendimit të Gjykatës Kushtetuese për Dekretin e mandatimit të kryeministrit të ri, derisa shton se e drejta e protestës iu takon vetëm qytetarëve.

Nga ana tjetër, oponentët politikë të Albin Kurtit, lirimin e masave e ndërlidhën me mundësinë që Lëvizja Vetëvendosje të organizojë protesta, pasi Gjykata Kushtetuese pritet këto ditë të marrë vendimin për Dekretin e Thaçit, që sipas tyre do të jetë në favor të këtij të fundit.

Mirëpo, këtë lehtësim të masave, kryeministri në detyrë, Albin Kurti duke folur për KosovaPress, ia atribuon menaxhimit të mirë që ka bërë qeveria e tij.

“Menaxhimi i drejt dhe i mirë i pandemisë ka krijuar kushtet për heqjen e disa prej masave. Për lirimin e qarkullimit dhe lëvizjes që kësaj radhe është nga ora 05:00 e mëngjesit deri në orën 21:00 të mbrëmjes. Pra qytetarët mund të lëvizin, kjo do të thotë që megjithatë duhet të mbajnë distancën fizike më së paku prej 2 metrave, të ruajnë higjienën personale dhe mos t’i praktikojnë vizitat familjare. Sa i përket organizimeve dhe protestave qytetare ato janë të qytetarëve dhe janë të drejta të tyre. Nuk kanë të bëjnë fare me vendimet e fundit,” tha Kurti.

Kryeministri Kurti tha se Ministria e Shëndetësisë është duke përgatitur manualin e situatave për largim të masave, por në mënyrë që mos të ketë rritje të përhapjes së COVID-19 ndërsa paralajmëroi hapjen e kopshteve të fëmijëve.

“Ka shumë gjasa që në fillim të muajit të ardhshëm do të hapen kopshtet, çerdhet e fëmijëve. Mirëpo tash Ministria e Shëndetësisë është në përgatitje të manualeve, doracakut të situatave të tilla në mënyrë që edhe të bënë largimin e masave. E në anën tjetër gjithashtu të mos kemi ndonjë rritje të infeksioneve. Edhe për xhamitë, kishat të gjitha po përgatiten manuale të tilla në mënyrë që të drejtat që po krijohen për qytetarët, po kthehen për qytetarët, mos të rezultojnë me kthim të infeksioneve.”

Ndryshe, rreth 3500 aktivistë të Lëvizjes Vetëvendosje nesër pritet që të mblidhen, për siç thuhet një provë tjetër proteste, në tre sheshet kryesore të Prishtinës, Skenderbeu, Ibrahim Rugova dhe Adem Jashari ndërkohë që pritet vendimi i Gjykatës Kushtetuese lidhur me ligjshmërinë e Dekretit të presidentit për mandatimin e Kryeministrit të ri.

Zyrtari për media i Lëvizjes Vetëvendosje, Arlind Manxhuka, tha se në këtë organizim pritet të marrin deri në 5 mijë persona.

”Kjo sigurisht se nuk është një protestë, por një performancë me 3.500 deri në 5.000 persona,” tha Manxhuka duke shtuar se në vazhdimësi kërkesa nga qytetarët për të protestuar në lidhje me zhvillimet në vend dhe si rezultat do ketë një provë të dytë.

”Pas realizimit të suksesshëm të provës së parë nga qytetarë e aktivistë ne kemi menduar të realizojmë testin e dytë por në përmasa më të mëdha”.

Zyrtari për media i Lëvizjes Vetëvendosje, Arlind Manxhuka, u mundua të bindë opinionin se ky aktivitet në sheshet e Prishtinës do të jetë korrekt ndaj rregullave e udhëzimeve në kohë pandemie.

”Në këtë mënyrë për të qenë korrekt dhe përbrenda rregullave e udhëzimeve me organet e rendit ne kemi dorëzuar edhe njoftimin te ta”.

Kjo provë për protestë është paraparë nga ora 17:00 deri në orën 19:00, ndërkohë bazuar në kërkesën zyrtare drejtuar policisë thuhet se pjesëmarrësit do të realizojnë një “performancë” në sheshet ”Skenderbeu”, ”Ibrahim Rugova” dhe ”Adem Jashari”.