Lehtësimi i masave, sot hapen teatrot dhe stadiumet; Shtyhet ora policore…

 Sot hynë në fuqi Palni i lehtësimit të masave Anticovid, të cilat ishin vendosur me qëllim të parandalimit të përhapjes së koronavirusit.

Duke nisur nga sot ora policore shtyhet me një orë, nga 00:00, deri në orën 06:00 ndërsa orari për lejimin e muzikës nëpër lokale do të ngelet po i njëjti, ora 22:00.

Sipas Planit të lehtësimit të masave anticovid prej sot lejohen kampionatet sportive, aktivitetet e teatrove, shfaqjeve artistike dhe kulturore, si dhe konferencave, me kapacitet të reduktuar deri në 30% të spektatorëve apo pjesëmarrësve, sipas protokolleve të IShP.

“Nga sot në fuqi plani i lehtësimit të mëtejshëm të masave anticovid, për t’i dhënë më shumë frymëmarrje jetës social-kulturore dhe turizmit në vend,” thekson ministrja e Shëndetësisë, Ogerta Manstirliu, përmes rrjetit social Facebook duke shtuar se mbetet ende alerti nga varianti Delta ndërsa përfundon:

“Varianti Delta është identifikuar edhe në vendet pranë nesh, ndaj nuk duhet të ulim vigjilencën dhe duhet të ecim me shpejtësi me vaksinimin anticovid, për mbrojtjen e jetës dhe shëndetit të qytetarëve.”

Ndryshe, lehtësimi i këtyre masave u bë pas përmirësimit të situatës epidemiologjike dhe uljes së shifrave të koronavirusit. Muaji qershor është mbyllur me 5 viktima nga COVID-19 ndërsa në spitalin Covid 1 prej më shumë se një jave nuk ka mbërritur asnjë urgjencë, e në pavijon ndodhet vetëm një person i shtruar.