Lehtësira doganore Kosovë-Shqipëri, hapet pika në Portin e Durrësit
Këshilli i Ministrave ka miratuar sot projektligjin për ratifikimin e marrëveshjes së Kosovës dhe Shqipërisë për zbatimin e lehtësirave doganore dhe mallrave, duke e kaluar atë për votim në parlament. Lajmi u bë i ditur nga ministrja e Financave, Delina Ibrahimaj, pas mbledhjes së qeverisë ku sqaroi se marrëveshja u firmos në mbledhjen e dy qeverive mbajtur në Shqipëri.
“Miratuam projektligjin për ratifikimin e marrëveshjes ndërmjet Këshillit të Ministrave të Republikës së Shqipërisë dhe Kosovës, sot kjo marrëveshje shkon në parlament për të gjithë procesin e ratifikimit dhe do të lehtësojë më tutje marrëdhënien e ndërsjelltë mes dy vendeve tona, duke njohur të gjithë licensat e të gjithë agjencisve doganore në kufi, duke unifikuar kontrollet doganore të të dyja vendeve për procedurat doganore.
Të dy vendet do të njohin kontrollet e vetëm një vendi duke ulur afatin dhe kohën e kontrollit doganor. Marrëveshja parashikon celjen e pikës doganore të Kosovës në portin e Durrësit, por i hapet rrugë të tjerave pika doganore të Kosovës në Shqipëri,” u shpreh Ibrahimaj.
Nga ana tjetër, sot në mbledhjen e Qeverisë së Kosovës është miratuar Projektligji për ratifikimin e marrëveshjes së Republikës së Kosovës dhe asaj të Shqipërisë për zbatimin e lehtësive doganore dhe mallrave
Qeveria e ka miratuar projektligjin e marrëveshjes ndërmjet Kosovës dhe Shqipërisë për zbatimin e lehtësive doganore dhe kontrollit të hyrje-daljes së mallrave.
Projektligjin për marrëveshjen e nënshkruar në mbledhjen mes dy qeverive më 26 nëntor të vitit 2021 e prezantoi kryeministri Albin Kurti.
Ministri i Financave, Hekuran Murati, tha se kjo marrëveshje parashikon një sërë lehtësish doganore dhe të tregtisë mes dy vendeve.
“Më tutje, parasheh edhe vendosjen e zyrës doganore të Republikës së Kosovës në zonën doganore të Portit të Durrësit dhe Porto Romanos. E gjithashtu, përfshin edhe thellimin e bashkëpunimit mes dy vendeve,” tha Hekuran Murati ndonëse homologia e saj nuk e zuri në gojë fare Porto Romanon.
Pse nuk janë harmonizuar Marrëveshjet e miratuara në Qeverinë e Shqipërisë dhe në Qeverinë e Kosovës nuk dihet!
