Lejet e qëndrimit për të mitur në BE, Eurostat: Shqiptarët të tretët në Europë

Shqipëria renditet ndër vendet kryesore të Europës për numrin e të miturve që marrin leje të para qëndrimi në vendet e Bashkimit Europian.

Sipas të dhënave të Eurostat, gjatë vitit 2024, 18.697 fëmijë shqiptarë nën moshën 18 vjeç morën leje të para qëndrimi në një nga vendet e BE-së, duke e pozicionuar Shqipërinë në vendin e tretë në Europë për këtë kategori pas Ukrainës dhe Bjellorusisë.

Migracioni i të miturve shqiptarë drejt BE-së është i përqendruar pothuajse tërësisht në tre shtete:

– Itali – 8.254 leje (44.1%)

– Greqi – 4.877 leje (26.1%)

– Gjermani – 4.165 leje (22.3%)

– Vendet e tjera të BE-së – vetëm 1.401 leje (7.5%)

Të dhënat e Eurostat tregojnë se arsyeja dominuese për lëshimin e lejeve të para qëndrimi për të mitur në BE mbetet bashkimi familjar, çka lidhet ngushtë me komunitetet e mëdha shqiptare në Itali dhe Greqi. Këto dy vende kanë qenë tradicionalisht destinacione kryesore të emigracionit shqiptar që prej viteve ’90, duke vijuar të tërheqin valë të reja të migrimit familjar.

Ndërkohë, Gjermania është shndërruar në vitet e fundit në një destinacion të rëndësishëm si për punësimin e të rriturve, ashtu edhe për vendosjen e familjeve të reja.

Në Europë

Në vitin 2024, vendet e BE-së lëshuan 540.445 leje të para qëndrimi për qytetarë jo-BE nën moshën 18 vjeç.

Prej tyre, 356.554 leje ose 66 për qind u dhanë për arsye të lidhura me bashkimin dhe formimin e familjes. 160.618 leje ose 30 për qind u lëshuan për arsye të tjera, përfshirë mbrojtjen ndërkombëtare, ndërsa 21,179 (4%) u dhanë për arsye të lidhura me arsimin.

Shtetet që lëshuan numrin më të lartë të lejeve për të mitur ishin Gjermania me 138.692 leje ose 26 për qind e totalit të BE-së, e ndjekur nga Spanja me 107.828 leje ose 20 për qind dhe Italia me 60.125 leje ose 11 për qind.

Në terma relativë, raporti i lejeve të para për çdo 100.000 banorë nën 18 vjeç ishte më i lartë në Maltë 3.379, Qipro 2.584 dhe Luksemburg 1.861. Në Letoni, Kroaci, Estoni, Bullgari dhe Rumani ky raport ishte nën 200 për 100.000 fëmijë.

Duhet theksuar se Franca, e cila ka vlerën më të ulët prej vetëm 17 leje për 100.000 të mitur, zakonisht nuk lëshon leje qëndrimi për fëmijë.

Duke parë shtetësinë e të miturve që morën leje të para qëndrimi në BE për të gjitha arsyet, 37 për qind ishin shtetas të vendeve aziatike, 27 për qind europianë jo-BE, 21 për qind nga vendet afrikane, 11 për qind nga Karaibet, Amerika Qendrore dhe Amerika e Jugut, ndërsa 2 për qind ishin shtetas të Amerikës së Veriut.

Siria përbënte 12 për qind të totalit të lejeve të para të lëshuara për të mitur në BE, e ndjekur nga Maroku me 7% dhe Ukraina me 6 për qind./Monitor/