“Leksione burrërie” nga hajdutët e votave, Gjiknuri: Mos eja fshehurazi! Meta: Jam gati, por…

Të dy vijnë nga partia kriminale PPSH, sot shiten si socialistë madje japin edhe leksione burrërie, por si deputeti i Partisë Socialiste, Damian Gjiknuri, ashtu dhe Presidenti i Republikës, Ilir Meta njihen si shkatërrues të sistemit zgjedhor dhe garës elektorale ndonëse njëri në vitin 2015 e tjetri në vitin 2001.

Damian Gjiknuri që shkaktoi tërmet me vjedhjet e votave në Dibër, i trimëruar nga kryeministri Edi Rama që kishte në krah, tha nga Vlora se nuk është e udhës që Presidenti të futet fshehurazi në Vlorë për politikë.

“Ne nuk jemi perfekt, nuk kemi realizime, por ne jemi më të mirët dhe qëndrojmë më të mirët. Ajo që është bërë në Vlorë, nuk ka koment. Kemi thënë në fushatën e parë para katër viteve që Vlorën do e bëjmë qytetin e dytë e pas Tiranës, e cilësuan si utopi, por tani është realitet sepse Vlora është thyer në një brand. Kushdo tjetër mund të ketë folur dhe flasë për Vlorën patriotike dhe historike. Vlora ka histori, por vëmendje nuk i është kushtuar nga qeveritë e tjera. Ju pëlqen apo jo e vërteta kjo është, Rama ka bërë realitet ndryshimin në Vlorë. A i kemi bëre të gjitha? Po ne prandaj duam të nisim punët që kemi nisur. Ne kemi paratë për rrugën Radhimë-Orikum, por edhe për rrugën e Selenicës, janë gjetur lekët,” tha Gjiknuri duke i bërë thirrje kryebashkiakut të Selenicës:

“Të ftojë Presidentin e Republikës, të mos vijnë fshehurazi Vlorë, por bashkë të inaugurojmë punimet. Nëse bëhet vepra, atëherë hajde sepse kështu e ka burrërinë Vlonjati, nëse vjen fshehurazi për politikë turp t’i vijë.”

I menjëhershëm ishte reagimi i Presidentit Meta i cili në kohën kur ishte Kryeministër nuk ishte primitiv si Edi Rama e Damian Gjiknur sepse manipulimi i votave ishte shumë i sofistikuar që me Dushkun i bëri xheloz edhe shumë diktatorë në botë.

Edhe sot Meta sfidoi Ramën dhe Gjiknurin se mund të shkojnë të gjithë bashkë dhe të takohen në Sheshin e Flamurit por jo me drejtoret e hipotekave.

“Unë Vlorën e kam dhe do ta kem në zemër. Zotërinjtë e duan Vlorën për ta futur në xhepat e tyre. Ngaqë iu janë fryrë xhepat, iu duket Vlora e vogël. Iu duket aq e vogël Vlora, sa kanë çuar dhe atë Afrimin e Unazës. Nuk kam shkuar unë në Selenicë, por ka ardhur Selenica këtu, kanë ardhur përfaqësuesit që kanë bërë peticion, pse është hequr projekti për rrugën e tyre, që ishte financuar nga sauditët. Ata u mashtruan. Presidenti nuk ka ikur fshehur, por në mes të ditës. Ka takuar gjithë përfaqësuesit atje, i ka dëgjuar shqetësimet e tyre. Jam gati të shkoj në çdo moment, edhe me këta, për t’u takuar me përfaqësuesit e Selenicës, jo me drejtorët e Vlorës. E kërkuan banorët nga Vlora deri në Orikum Presidentin, pasi pronat e tyre prekeshin nga një projekt i ri. Për këtë çështje kanë kërkuar dhe Avokatin e Popullit dhe po pres raportin dhe do të shkoj sërish. Ka një ligj për konsultimin publik, për çdo vepër publike që bëhet. Çdo gjë duhet bërë transparente. Unë kam qenë se ata më kanë kërkuar, dhe kanë qenë 200-300 veta atje me shqetësime reale,” sqaroi rethanat e takimit në Seelenicë Ilir Meta ndërsa për Damian Gjiknurin kishte përgjigje siç i takon një komunisti-komunistit:

“Kur të kenë dëshirë, kur të dojë Damian, të marrë dhe Gurunë me vete, të shkojmë në Selenicë t’i takojmë banorët. Presidentin e kërkoi populli. Presidenti vete në Vranisht ditën, po vete dhe natën. Në rastin konkret ka vajtur ditën, por po shkova natën do lajmëroj Damian. Presidenti lëviz gjithmonë në mes të ditës si president i popullit, jo si president i Bllokut me 400 makina, sirena e drita. Presidenti që keni këtu nuk ka frikë nga populli, do dal edhe në mes të Vlorës, në mes të Elbasanit, në mes të Librazhdit. Po dëshiroi Taulanti të më ftojë atje, do vete. Ata të mos merren me këto gjëra, por të merrem me pandeminë, të blejnë pajisje. Nuk vazhdohet në këtë mënyrë. Duhet seriozitet për pandeminë, ekonominë, dhe për zgjedhjet dhe standardet e zgjedhjeve,”tha Meta duke përfunduar:

“Janë shqetësuar nga mesazhet e presidentit, le të shqetësohen dhe tmerrohen të gjithë ata që mendojnë se do të bëjnë tërmet, si në Dibër e kudo. Qofshin punonjës police apo banditë, gjithçka qofshin. Zgjedhjet e para katër vitesh kanë qenë të manipuluara, e di gjithë bota. Dosjet u bënë ping-pong. Se paska frikë presidenti nga Damian, që të shkojë fshehurazi në Vlorë. Kur të dojë Damian të marrë edhe Gurunë e gjatë dhe atë Gurunë tjetër e të dalin te Sheshi i Flamurit. Le të marrin edhe drejtorët e Hipotekave, se e di gjithë Vlorë se çfarë kanë bërë e po bëjnë me pronat. Nuk janë sheikë që do vijnë aty, por janë tjerët që do vijnë përmes sheikëve. Do të keni shumë shpejt fakte.”