Lëkundje të forta në Maqedoni të Veriut, panik ndër qytetarët e Gostivarit

Për vetëm një orë në Maqedoninë e Veriut janë regjistruar tri lëkundje të forta të tokës ku më e forta ishte 4.9 të shkallës Rihter.

Sipas Qendrës Sizmologjike Mesdhetare, EMSC, tërmeti i cili ra në orën 22.17 me magnitudë 4.9 të shkallës Rihter dhe thellësi 2 km ishte me epiqendër vetëm 17 kilometra nga qyteti i Gostivarit dhe 54 km nga Prizreni.

Nuk raportohet ende për viktima por tërmeti ka shkaktuar panik ndër qytetarët e Gostivarit dhe Prizrenit në Kosovë.

Ndryshe, kjo ishte lëkundja e tretë brenda një ore me epiqendër në një zonë. Vetëm 11 minuta pas këtij tërmeti, EMSC raporton se në orën 22:28 ra një tërmet me magnitudë 4.4 të shkallës Rihter dhe thellësi 2 kilometra, i cili ra 9 km nga Gostivari dhe 56 kilometra nga Prizreni.

Ndërsa në orën 20:40 EMSC raportoi një tërmet me magnitudë 3.0 të shkallës Rihter dhe thellësi 0 kilometra ishte me epiqendër 18 km nga qyteti i Gostivarit dhe 61 kilometra nga qyteti i Prizrenit.