Letër BabaEdit të Vitit të Ri

Meqë Babagjyshi i Vitit të Ri nuk e pa të arsyeshme të humb kohë në Shqipëri, kur këtu Ju, Edi Rama, jeni Babagjysh i ditës dhe natës, të zezës dhe të bardhës, të varfërve dhe të pasurve, prokurorive dhe gjykatave, drogës dhe antidrogës, studentëve dhe pedagogëve, pacientëve dhe doktorëve, mazhorancës dhe opozitës, edhe Unë po të drejtohem me këtë letër sot kur kazanët që ke krijuar, ta shpifin aq shumë, sa më i moderuar është ERTV-ja që ke shpikur, se ato që qeveria që drejton i quan “Kombëtare”.

I nderuar BabaEdi i Reformës në Drejtësi, Gjykatës Kushtetuese, Gjykatës së Lartë dhe Prokurorisë së Përgjithshme, kur mund të shpresojnë shqiptarët, vetëm në vitin 2019 mos thuaj, të lutem, që ky vend do ti kthehet normalitetit dhe kur ti merr IKMT-n dhe e ndërsen Fadromën në një lagje për ta shembur për bashkimët, kastratët, salillarët dhe gjicët e tu, ata të kenë një vend ku mund të ankohen. Jo të fitojnë gjyqe, se këtë e di që nuk e bëjnë dot pa lejen tënde, por të paktën e kanë të hapur rrugën drejtë Strasburgut, në kohën kur Zaho do të bëhet burrë me thinja dhe ti meqë e ke thënë vetë do të rrufisësh kafen në Vuno, me ata që të ndihmuan në zbatimin e kësaj Reforme në Drejtësi.

BabaEdi i Prokurores së Përgjithshme kur do të marrë fund ky mandati i Arta Ulsi Markut, të lutem më thuaj sepse asaj i është mbushur mendja se është Kryeprokurore. Të paktën na e thuaj këtë pjesë se krimi jo që lodhet për këto budallëqe, nuk i hyjnë në punë fare se kush e drejton këtë institucion kaq të rëndësishëm për qytetarët normal të këtij vendi që sot janë specie në zhdukje.

Të gjithë atyre që ke angazhuar në Vetting, të lutem BabaEi thuaju le të qetësohen pak se kanë filluar të binden se vërtetë po bëjnë Vetting. Dhe kur ti ulësh me këmbë në tokë, më thuaj të lutem a do të konfiskohen gjithë pasuritë e prokurorëve dhe gjykatësve që dolën të paligjshme. Apo thuaj ti, po tu marrësh atyre çfarë do të bësh me pasuritë tuaja. I shkarkove ministrat por shumë ama shumë kanë vjedhur. Një mal me PPP prodhon vetëm një mal me vjedhje, e këto siç i bëri kjo Qeveri, jo vetëm Guinnessi ka punë me to!    

Më thuaj të lutem si BabaEdi i mbjelljes dhe trafikut të drogës që je, si dhe BabEdi i luftës kundër mbjelljes dhe trafikut të drogës, cili do të jetë fati i punëmarrësve të këtij biznesi që poqi dhe e dogji Sajme Qorri me Drejtorët e tij. Të shkretët janë mërzitur kur shohin Habilajt dhe të ngjashmit nëpër Sarandë dhe Tepelenë, që vetëm policia e Fatmir Xhafajt nuk i arrestonte dot, se si i gëzojnë lekët e drogës të cilën as nuk e kishin mbjell dhe as nuk e kishin korrur. Madje edhe skafet së fundi në emër të luftës kundër këtij trafiku u shndërruan në klering. Drogë për transport, transport për drogë! Ç’të bëjnë skafistët e shkretë, i mori në qafë Saliu me liberalizimin e vizave dhe më nuk e merr askush detin në këmbë. Ata Sirianët i mori Aleksandar Vuçiçi për ti sistemuar nëpër Evropë, dhe vetë skafistët me dënesë thonë po si nuk u bëre BabaEdi edhe i sirianëve, je që je!   

BabaEdi do t’ja shuash kuriozitetin atyre patriotëve që kishin krijuar bindjen se e ruajtën detin, se Marrëveshja me Greqinë nuk u firmos vetëm falë Gjykatës Kushtetuese dhe kurrfarë presioni ose parimi nuk ishte në pyetje. Dhe, pasi që ta sqarosh këtë milet dhe Dhimitrin e Kotsiasit, do ta jetësosh firmosjen e Marrëveshjes me Greqinë në vitin 2019 sido që të vete puna me zgjerimin e BE.

BabaEdi, të lutem, përveç faktit se Kastrati duhet të pasurohet, meqë i ra për hise të jetë mik i kryeministrit me të cilin ndanë të mirat dhe të këqijat e Rrugës së Kombit dhe jo vetëm, a mund ta gjesh edhe një argument dhe ta urdhërosh që të pasurohet më pak. Kështu shqiptarët e Kukësit, Kosovës dhe Luginës së Preshevës të paguajnë më pak për lëvizjen nëpër tokë shqiptare. Apo e ke ndarë mendjen t’ju shuash ëndrrat e shqiptarëve, që më shumë se një shekuj i projektonin  mbi Shkumbin, duke ju tenderuar ëndrrën e re: Mbi Kalimash!

Interesante BabaEdi, më duhet ta pranoj, por me Alpinët ç’do të bësh. Je që je, madje edhe nxënës i bolshevikut Noli, taksën ju fute gegëve, flakën nuk ja futën as traut të ndarjes shqiptare dhe as atij të mikut tënd Kastrati, pse nuk i lë në punë të vetë vëlla. Hiqe atë traun e kufirit, dhe ashtu siç e kishte parashikuar Dhimitër Pasko, le ta ndërtojnë jetën e tyre, meqë tokën dhe klimën u ka dhënë Zoti, dhe një ditë kur shqiptarëve poshtë Fushë Krujës t’u konsumohet urrejtja, ta bëjnë edhe Ekonominë Kombëtare.

A e meritojnë?! Unë mendoj se po, jo pse jam i asaj treve që ti nuk e honeps dot. Por, ja i bleve apo i binde, pak rëndësi, për t’ju fut ju fute, u bëre kështu edhe BabaEdi i ndarjes së shqiptarëve; Të paktën një respekt sado pak njerëzor. Dhe këtyre kafshëve shtëpiake që ke në partinë tënde, thuaju mos ti ofendojnë orë e çast, sepse fundi i botës nuk është kur ta kalosh Fushë Krujën!

Më thuaj të lutem pas atyre protestave që i organizove kundër Armëve Kimike pse e krijove bindjen se je Zoti i protestave apo se thjeshtë Zot të tillë nuk kishte në kohërat e lashta. Pavarësisht se ata pak aktorë që protestojnë janë të bindur se po mbrojnë Teatrin Kombëtar nga shembja, dhe gojët e liga thonë se Sajme Qorri po i organizon banorët tek Unaza e Re, si bolshevik i ndytë që je, unë të konsideroj edhe BabaEdi i protestave; Meqë e ke këtë vlerësim ose titull thuaje si të duash, më thuaj të lutem kur do ti japësh fund këtyre protestave.

Jo për gjë, por a e ke vërejtur se protestuesit nuk janë kundër që Fusha me shokë po pasurohet në mënyrë makabre, por për Teatrin Kombëtar është fjala. Apo e ke ndarë mendjen dhe nuk do ti mohosh atij grushti të vogël artistësh që nuk dorëzohen, edhe kënaqësinë që të protestojnë. Megjithëse ti e di mirë se çfarë do të thotë të protestosh, sepse prej se filluan protestat në Shqipërinë pluraliste, ti vetëm për ti minuar ke qenë mjeshtër. Këtë madje nuk e kuptonte as Lali Eri që i organizonte me urdhrin tënd, dhe dështonte kur poashtu ti kishe urdhëruar. Siç ndodhi edhe me G-99 kur mori kot, dhe ku në Berat. E G-99 ç’e pate fat…

Nuk e di a e ke lodhë kokën me projektin tek Unaza e Re apo vetëm e ke firmosur. Me thënë të drejtën Mond Bego mund të fitoj ashtu siç e ka menduar Lali Eri por edhe sikur ti mungoj një çapë eurosh për sistemimin e këtyre banorëve në 2-3 pallate, nuk është se bëhet hataja jo. Ti si BabaEdi i protestave që je dhe BabaEdi i pallateve pa lidhje, siç e shpike Komunën e Parisit, gjejë edhe një Komunë më ordinere, s’ka pse të jetë aq madhështore dhe sistemo gjithë atë milet që Lamçe mendonte ti hidhte në rrugë. Nëse e konsideron këtë propozim, të lutem më thuaj, përveç të tjerash është humane. Shumë më humane se sa ato filmat “Kryeministër ndryshe” që luan me familjet e varfra dhe taksat e shqiptarëve.   

Që në ditët e para të protestave të studentëve unë nuk kam dyshuar se je ti ideatori dhe nuk e vë as sot në dyshim. Pse të dolën nga kontrolli, kjo ka vend për tu diskutuar më shumë se sa në një mbledhje të lodhtë të kryesisë së PS, ku asnjëri nuk ka guximin të flas. Jo për Monën e Likes por as për Arlind Qorrin, se fresshistat e shkretë ti i bëre telef vet. Jo vetëm që je mjeshtër i organizimit të protestave të pista por je vet BabaEdi i protestave. Vetëm një gjë nuk e ke llogaritur, se brumi i protestave që i ke menduar kanë shumë më shumë arsye se sa të shpërqëndrojnë vëmendjen nga protesta te Unaza e Re. Në mesin e studentëve ka shumë që nuk e përballojnë dot tarifën dhe pjesëmarrja në një arenë të tillë përballjeje e bënë shumë më të fortë se sa një studentë të manipuluar. Në këtë rast, kasa jote fiskale ishte e pakoaliduar ose i ke bërë llogaritë pa TVSH, dhe tani kostoja e kësaj aventure po të bie kokës. Gjithsesi BabaEdi i protestave mbetesh ashtu siç vajti puna me këto protesta e sa për pedagogët, atë e ke të qartë vetë, kur ka pasur nga viti yt i artë 1946, njerëz me dinjitet në krye të Universiteteve.

Këtë Vettingun në Politikë nuk e kuptojë pse nuk e lejove por përderisa e largove LSI-në nga Qeveria dhe e fute në Opozitë, me plotë gojën të them BabaEdi i Opozitës je. Goditje më të fortë se me LSI-në që i ke dhënë, Opozita as që mund të imagjinonte e ndoshta në këtë farë feje as vetë nuk e ke menduar. Por qëllimit deri më tani ja ke arritur plotësisht dhe meqë nuk mund të përgjigjesh deri në muajin qershor, shkruaje përgjigjen dhe fute në shishe, dhe kur shkon në zonën tënde operative hidhe në deti. Ndoshta deri në qershorin e vitit 2019 do të kemi rastin ta lexojmë, cilën bashki do ta merr Likja!

Por mos harro dhe më duhet ta them, ke humbur rastin dhe të kushtoj shumë pse nuk u bëre BabaEdi i Vettingut në Politikë. E ke humbur një rast të madh, sepse lehtësisht mund ta bastardoje siç bëre me Vettingun në Drejtësi, ndoshta edhe me ulsitë që ke, edhe më keq!

Protesta e Diasporës tregoi se BabaEdi i protestave je! Për ata që e projektuan veten në një protestë Bukureshti apo Beogradi, u zhgënjyen shumë. U zhgënjyen po aq sa unë sepse u habita se pse kjo protestë organizohet para kryeministrisë dhe jo në një kafene aty rrotull nga blloku. Të gjitha kafenetë ishin plotë dhe një konglomerat kafenesh do të krijonin një grupim që do ta trazonin atë idenë që ke krijuar si BabaEdi i Vitit të ri të Shqipërisë.

Po, po, në kafene, aty ku shqiptarët vazhdojnë të diskutojnë se si duhet të qeveriset ky vend, si bëhet opozita dhe si bëhet vettingu në drejtësi e politikë, dhe në fund edhe cila do të jetë e ardhmja e këtij vendi.

Çuditërisht vetëm një gjë kanë harruar ashtu sikur se edhe ti që ke marrë kot: Kur do të vijë dita që edhe fëmijët shqiptarë të gëzohen dhe Babagjyshi i Vitit të Ri të vij në Shqipëri?! Dhe, kur të ndodhë kjo, ku do të jeni Ju, BabaEdi…