Letër Bashës dhe Kryemadhit, Meta: Mos pritni zgjedhje daneze, por…

Presidenti i Republikës, Ilir Meta, sot bëri të ditur se i ka dërguar letër Drejtorit të Policisë së Shtetit, Ardi Veliu, për Durrësit, dhe do i dërgojë edhe për Vlorën, ku thekson me emra dhe fakte, për ata që po kryejnë krime zgjedhore. Ndërkohë letër i ka dërguar edhe Kryetarit të Partisë Demokratike, Lulzim Basha, dhe Kryetares së LSI, Monika Kryemadhi, pasi kanë përgjegjësi të madhe sepse kanë ikur nga Kuvendi i Shqipërisë, kur ai thotë se i kishte paralajmëruar me kohë për pasojat. Zgjedhje daneze të mos presin, tha Meta, por të koordinohen për të shmangur çdo provokim dhe për të ruajtur çdo votë.

“Gjatë gjithë kohës dërgoj letra, qeverisë, policisë, SHISH, i kam dërguar 18 letra prokurorisë vetëm për këtë çështje. Do bëj dhe hetim, kush kërkon të marrë zvarrë fatin e shqiptarëve. Ndaj ju bëj thirrje të reflektojnë urgjentisht dhe të merret vendim për këto çështje. Duhet ta dinë të gjithë çunat problematikë, që do të përfundojnë në burg. Do të ketë ligj të posaçëm, që nuk do të përfshihen më në administratën shtetërore. Nuk do ta ndërrojmë administratën sipas qejfit të partive,” tha Ilir Meta duke bërë të ditur se i ka dërguar letër dhe Bashës e Kryemadhit:

“Në këtë drejtim i kam dërguar një letër zyrtare Bashës dhe Kryemadhit, sepse ata kanë një përgjegjësi historike nesër, edhe sot, që të jenë tepër të kujdesshëm, të porosisin edhe të gjithë simpatizantët e tyre të jenë të tillë, në mënyrë që cdo provokim që do të kenë ata, të izolohet. Të gjithë të ruajnë qetësinë, do jetë një ditë e mrekullueshme për Shqipërinë. Mjerë kush punon për krimin zgjedhor, kjo histori ka mbaruar. Asnjë ligj i reformës në drejtësi nuk do të preket, do të punohet me ligjet e qeverisë aktuale, sidomos ato për ministrinë e Brendshme dhe policinë, për 48 orë vendoset rendi dhe çunat problematikë shkojnë aty ku e kanë vendin.

Letra për ata është përgjegjësi e madhe, sepse kanë ikur nga Kuvendi i Shqipërisë, kundër Presidentit, që i ka paralajmëruar me kohë për pasojat. Zgjedhje daneze të mos presin as ata, se nuk i kam pritur as unë, por të koordinohen për të shmangur çdo provokim, për të ruajtur çdo votë, edhe të kandidatëve socialistë, sepse pasi të mbarojë numërimi i votave për partitë, mund të bjerë përqendrimi dhe mund të fillojnë lojërat për të ndërruar kandidatët,” tha Meta në një konferencë të jashtëzakonshme duke shtuar se letër i kishte dërguar edhe Drejtorit të Policisë së Shtetit për krimin zgjedhor në Durrës:

“Kam dërguar letër edhe për Durrësin, për drejtorin e Policisë s Shtetit, me të gjithë emrat që po kryejnë krime zgjedhore në Durrës, që shkojnë e intimidojnë qytetarët atje, tani kam letër përsëri për drejtorin e policisë për Vlorën, me emra dhe fakte. Këto janë gjëra të vogla, përgjegjësia tani për çdo ngjarje që ndodh bie mbi prokurorinë, mbi policinë, mbi komisionerët, të bëjnë detyrën, të qëndrojnë të paanshëm, dhe është përgjegjësi historike, t’i thërrasin mendjen, është provë zjarri.”

I pashmangshëm ishte interesi i gazetarëve përplasjen e pashmebullt të Presidentit të Republikës, Ilir Meta me Ambasadoren e SHBA, Yuri Kim, ku Meta foli për ndërhyrjen e Serbisë sot në punët e brendshme të Shqipërisë, por jo edhe në vitin 2013 kur Serbia ndërhyri dhe realizoi Marrëveshjen për Aelancën e Qelbësirave, në bazë të cilës ai u bë President dhe Edi Rama Kryeministër!

“Siç e dini ju Presidenti i Serbisë ndërhyri në punët e brendshme të Shqipërisë. Doli me parrullën se Luli është kukull e doktorit. Kishte edhe sondazhe nga Batoni, njeriu më i besueshëm i Beogradit. E gjithë këto që ndodhën në Elbasan Kavajë e që duan të bëjnë në Vlorë e kudo janë pjesë e skenarit..

Duke përdorur policinë e partisë, prokurorët  e Agaçit që udhëheq vetingun që ka bërë gjithë aferat. Kjo gjë nuk do ndodhë. Kam respekt për gjithë partnerët ndërkombëtarë e të palëkundur të SHBA i dua se na kanë frymëzuar për liri e demokraci. Jam i përkushtuar që Shqipëria të angazhohet sa më shpejt në BE, dhe Shqipëria nuk do bëhet gazi i Botës nesër. JO ! Shqipëria do të shndrrisë sepse shqiptarët do votojnë për Shqipërine e shqiptarëve. Prokuroria e policia të bëjnë detyrën të zbatojnë ligjin.”

Njeriu më proserb në Shqipëri pas vdekjes së Enver Hoxhës, Ilir Meta, sot bënë patriotin edhe në momentin kur i bënë thirrje shqiptarëve të votojnë.

“Nuk impresionohem nga ata lobistë që flasin anglisht dhe mendojnë serbisht për Shqipërinë. Qytetarët janë ndërgjegjësuar, me hir e pa hir Shqipëria nesër do jetë model. Presidenti ka vetëm një votë të barabartë me gjithë të tjerët. kështu që ju falënderoj shumë, ju ftoj të jeni në gatishmëri të parandalojmë çdo incident, parandalimi më i mirë është përgjigjet e shpejta. Boll  u bë 4 vjet ping pong me dosjen e Shijakut e Dibrës,” tha Meta ky shpikës i blerjes dhe shitjes së votës sot President i cili bënë edhe thirrje.

“Të dashur qytetarë me qetësi e vendosmëri votoni për kë t’ju dojë zemra. Keni një mundësi të shkëlqyer dhe të coni sinjal të fortë për partitë. Votoni për kandidatët që ju mendoni se nuk do ngrenë dorën për të bërë ligje për oligarkët.”