Letër Kurtit, Thaçi i kërkon propozimin për Kryeministrin e ri
Presidenti i Kosovës, Hashim Thaçi, i është përgjigjur përmes dy letrave Kryeministrit në detyrë duke ju drejtuar si Kryetarit të Lëvizjes Vetëvendosje, Albin Kurti, duke i kërkuar një emër të ri për ta mandatuar si kandidat për ta formuar Qeverinë e re.
Në letrën e parë drejtuar Kurtit, Thaçi shprehet se pas mocionit të mosbesimit ndaj Qeverisë (Vendimi i Kuvendit të Republikës së Kosovës Nr. 07-V-013, të datës 25.03.20120), në pajtim me nenin 95 të Kushtetutës së Republikës së Kosovës do t’i ndërmarrë hapat e nevojshëm për caktimin e mandatarit për formimin e Qeverisë së Republikës së Kosovës.
“Duke marrë parasysh Nenin 95 të Kushtetutës, Vendimin e Gjykatës Kushtetuese KO103/14, të datës 1 korrik 2014, dhe Vendimin e Komisionit Qendror të Zgjedhjeve për certifikimin e rezultateve përfundimtare të Zgjedhjeve të Parakohshme për Kuvendin e Republikës së Kosovës, të mbajtura më 6 tetor 2019 (Protokoll i KQZ-së nr. 1845-2029, 27.11.2019), Lëvizja Vetëvendosje, është subjekti politik që ka fituar shumicën në Kuvend për të formuar Qeverinë dhe ka të drejtën e propozimit të kandidatit të ri, për të formuar Qeverinë. Ju lutem, në emër të Lëvizjes Vetëvendosje, propozoni kandidatin e ri, të cilin do të mandatoj për formimin e Qeverisë së Republikës së Kosovës,” thekson Presidenti Thaçi në letrën drejtuar, siç thuhet, Kryetarit të Lëvizjes Vetëvendosje, Albin Kurti.
Ndërsa, në letrën e dytë, Presidenti Thaçi i shkruan se takimi i djeshëm mes tyre, pas mocionit të mosbesimit ndaj Qeverisë, ka qenë takim konsultues me të si Kryetar i Lëvizjes Vetëvendosje, si lider i partisë së parë sipas rezultateve përfundimtare të Zgjedhjeve të Parakohshme për Kuvendin e Republikës së Kosovës, të mbajtura më 6 tetor 2019.
“Ka qenë një takim i karakterit formal, juridik e procedural, për konsultim për të vlerësuar nëse është në interesin e partisë politike që përfaqësoni ju formimi i Qeverisë së re apo shpërndarja e Kuvendit,” thekson në sqarimin e tij Presidentit Thaçi.
Ndryshe, Kryeministri në detyrë dhe Kryetari i Lëvizjes Vetëvendosje , Albin Kurti, dje i ka shkruar dy letra Presidentit Thaçi, duke i bërë të qartë se me të do të diskutojë vetëm për shpalljen e zgjedhjeve dhe luftimin e pandemisë së koronavirusit.
