Letër Presidentit SHBA, Vjosa Osmani: Ndihmë për anëtarësimin e Kosovës në NATO
Duke falënderuar përmes një letre Presidentin e SHBA, Joe Biden, për urimin që i bëri Kosovës me rastin e 14 vjetorit të Pavarësisë, Presidentja Vjosa Osmani vlerëson se SHBA çdo herë mund të llogarisë në miqësinë e Kosovës teksa kërkon dhe anëtarësimin në NATO.
“Në këtë kohë sfiduese, dhe si gjithmonë, Shtetet e Bashkuara mund të vazhdojnë të llogarisin në Republikën e Kosovës si një mike dhe aleate e përkushtuar dhe si një vend që do të mbrojë interesat tona të përbashkëta,” thekson Presidentja Osmani duke vlerësuar se miqësia dhe partneriteti i qëndrueshëm midis Kosovës dhe Shteteve të Bashkuara janë të rrënjosura në vlerat e përbashkëta demokratike dhe një përkushtim për promovimin e stabilitetit dhe paqes së qëndrueshme.
“Integrimi euroatlantik ka qenë gjithmonë synimi ynë, por sot, në dritën e ngjarjeve të paprecedentë në kontinentin evropian, është prioriteti ynë kryesor i sigurisë kombëtare. Evropa po përballet me kohërat më të errëta dhe më të rrezikshme që nga fundi i Luftës së Ftohtë. Ndërsa ne ndajmë qëllimin e përbashkët për mbrojtjen dhe promovimin e sigurisë globale, anëtarësimi i Kosovës në NATO është bërë imperativ.
Argumentet që kundërshtojnë anëtarësimin e Kosovës në NATO shpërfillin imperativat e sigurisë në Ballkanin Perëndimor dhe nuk i shërbejnë interesit të botës së lirë demokratike, e cila është nën rrethimin në rritje nga tendencat autoritare dhe politikat e tyre agresive”.
Kosova, vlerëson Vjosa Osmani, e ka dëshmuar vazhdimisht se si dhe pse e meriton anëtarësimin në NATO.
“Pa dyshim, Republika e Kosovës ka dëshmuar vazhdimisht se si dhe pse e meriton, beson plotësisht dhe duhet të jetë anëtare e plotë e familjes euroatlantike të kombeve. Vendi im dhe qytetarët e tij kanë luftuar për dekada jo vetëm për lirinë, por për vendin tonë të merituar në familjen e kombeve euroatlantike, si një partner i besueshëm dhe i aftë në ndërtimin, ruajtjen dhe mbrojtjen e paqes dhe demokracisë. Kosova është vendi më pro amerikan dhe pro NATO-s në botë.
Megjithatë, edhe sot e kësaj dite, Kosova mbetet e përjashtuar nga procesi, marrëveshjet dhe programet e zgjerimit të NATO-s, siç është Partneriteti për Paqe (Pfp) dhe ende nuk është bërë anëtare e plotë e Kartës së Adriatikut,” thekson Presidentja e Kosovës, Vjosa Osmani, duke u shprehur se pret me padurim mundësinë për t’u takuar personalisht me Presidentin Biden, sa më shpejt që të jetë e mundur.
