Letër publike jo për Lulzim Bashën!

Vëllait të Vëllait të Astrit Avdylajt,

Më 1 Qershor rilindja nisi zyrtarisht fushatën e zgjedhjeve të 30 Qershorit. Ndërsa Partia Socialiste kryetar i së cilës jeni Ju, apo që ju kanë votuar, si mbështetës ose simpatizantë, nuk ishte në dijeni se votat e tyre vijnë nga krimi i organizuar, dje është dëshpëruar kur u vërtetua se nuk është partia ajo që me votën e saj ju ka bërë Kryeministër.

Fatkeqësisht jo vetëm për Ju por edhe për vendin, pas publikimit të përgjimeve nga gazeta gjermane “Bild”, konfirmohet se qysh në vitin 2017 kur ju braktisi Ilir Meta së bashku me LSI-në, udhëheqja juaj politike ka hyrë në rrugën pa krye të frikës nga fitorja në zgjedhje, të panikut nga drejtësia dhe të kërcënimeve e të orvatjeve të dëshpëruara, në dëm të Shqipërisë e të çdo shqiptari të interesuar për paqe sociale, zhvillim ekonomik, integrim të plotë të vendit në Bashkimin Evropian.

Futja në parlament me votat e krimit, Bandës së Avdylajve dhe jo vetëm, nxitja e dhunës, garantimi i votave nga kriminelët, janë në thelb arratisje nga misioni, funksioni dhe korniza e vlerave të një partie demokratike. Jam sinqerisht i keqardhur për këtë.

Unë nuk jam ai që dua t’ju shoh në krye të vendit. Nuk ju kam votuar dhe nuk do t’ju votoj sa të keni jetë, po thjeshtë shpresoj të më lexoni.

Përdorimi i fjalëve nga letra Juaj “LETËR E SHTATË PUBLIKE JO PËR LULZIM BASHË” nuk është plagjiaturë, por përpjekje për të nxitur reflektimin tuaj, për të kuptuar se si u ndjenë ata kur Ju iu drejtuat me një Letër Publike ndonëse Qeveria që Ju drejtoni i kishte vjedhur në sahat të ujit dhe sahat të rrymës, në xhepa dhe karburant, dhe dje bashkëqytetarët demokratë e kuptuan se ishin të vjedhur edhe në kutitë e votimit.

Kur iu drejtuat Kryetarit të Partisë Demokratike me 6 letra të hapura, isha me dy mendje nëse i keni shkruar Ju apo Vangjush Dako, ose edhe ndonjëri prej Avdylajve, Niçja apo Çimi. Fatkeqësisht rezultoi që Ju jeni shkronjësi i gjithë këtij pasqyrimi të realitetit shqiptar, i cili ashtu sikur se banda e rilindjes, deprimitivizim të politikës e konsideron rikthimin e protestave por jo edhe vjedhjen e votave.

Pas një gjysmë shekulli diktature komuniste, dhe gjysmën e gjysmës tjetër me grahmat e fundit të kësaj diktature, sot Enver Hoxha respektohet më shumë se kurrë; Nipi i tij ngritë fabrikë për përpunimin e kokainës dhe trajtohet si Pasha, djali i një deputete vret njerëz si lepuj dhe është i lirë si skifteri, ndërsa bashkëqytetarët e tu demokratë, për 83 mijë lekë vuajnë dënimin me 2 vjet burg. Jo që nuk kanë paguar por që nuk kanë të paguajnë. Mos gërthit mashtrim, mashtrim, mashtrim, ik në burgun e Lezhës, shkodran është, mos t’ia them emrin se Ju e keni zakon e përgojoni nëpër mitingjet e Juaja pa pikë respekti nëse është socialist apo demokrat, kosovarë apo maqedons, pulë apo dhelpër, s’e ke problem!         

Sot e gjithë ditën, jeta jonë politike nuk vuan nga paaftësia për ta respektuar kundërshtarin pa e sakatuar publikisht, me sulme që rëndom tejkalojnë çdo kufi etik dhe kthehen shpesh në dhunë gjuhe të përdalë me egërsi, deri në farë e në fis. Por vuan sepse Ju nuk e bëni këtë respekt! Po, Ju dhe vetëm Ju!

Sipas  anketimeve tuaja dhe miqëve tuaj ndërkombëtarë, shumica e demokratëve nuk mbështesin as djegien e mandateve, as dhunën e ushtruar në protesta dhe as bojkotin e zgjedhjeve nga ana e udhëheqjes suaj. Meqë jeni mjeshtër i sondazheve, bëjë një dhe pyet shumicën e demokratëve  a e mbështesin idenë që votat e tyre t’i prodhojnë dhe numërojnë Avdylajt, Dako, Niçja dhe Çimi!

Askush ndër ju mbase, unë jo e jo, s’e kishte menduar se do të vinte dita kur partia juaj, e lindur si parti kriminale, futet në një sistem pluralist pa asnjë gjëmbë në këmbë dhe rikthehet sërish në parti kriminale. Çudi dhe degradim i madh njëkohësisht! Por sot, me një vendim sovran të botës së krimit shqiptar jemi përpara këtij fakti të kryer dhe s’kemi, mesa duket, asnjë mundësi ta zhbëjmë një zhvillim kaq negativ.

Zgjedhjet janë një e drejtë e panegociueshme kushtetuese e të gjithë atyre që duan të zgjedhin dhe një detyrim i pashmangshëm kushtetues i të gjithë atyre që duan të zgjidhen.

Por krimi i organizuar nuk do zgjedhje, sepse i trembet një disfate elektorale të radhës. Ndërsa Ju siç duket nuk e shkelni dot detyrimin, sepse doni të zgjidheni edhe në zgjedhjet e radhës, nga krimi i organizuar.

Pas publikimit të përgjimeve nga “Bild” kam dëgjuar shpesh pyetjen: A mund të bëhen zgjedhje demokratike pa krimin e organizuar?

Zgjedhje demokratike pa krimin e organizuar do të thotë që të gjithë të gëzojnë të drejtën të zgjidhen. Por nëse përjashtimi në çfarëdo forme i krimit të organizuar nga zgjedhjet i bën ato antidemokratike, përjashtimi nga ana e Juaj e krimit të organizuar nga zgjedhjet nuk i bën ato jodemokratike.

Prandaj unë e ngre ndryshe pyetjen: A mundet që zgjedhjet demokratike të bëhen vetëm nëse do krimi i organizuar?

Imagjinoni për një moment sikur zhvillimi i zgjedhjeve në këtë vend të varet nga do apo s’do krimi i organizuar të bëhen! Mendje të lehta rilindase e mediatike, kanë rrahur së fundmi shumë ujë në havan, lidhur me sa e tmerrshme qenka të bëhen zgjedhjet pa krimin e organizuar dhe sa e thjeshtë qenka, që të mos shtyhet data e zgjedhjeve meqë s’do krimi i organizuar!

Sinqerisht ju them, po të ishte kaq e thjeshtë, do të ishit Ju i pari që do të merrnit flamurin e shtyrjes së zgjedhjeve, sepse në fund të fundit do të parapëlqenit të përqëndroheshit non stop tek punët e qeverisë, pa qenë nevoja t’i bëni rreth e përqark për fushatë krimit të organizuar në Shqipëri. Por jo vetëm pse është e pamundur nga pikëpamja e Kodit të krimit të organizuar, por edhe pse është e tmerrshme nga këndvështrimi i bashkëjetesës demokratike, por unë Ju besoj, se krimi i organizuar mbetet absolutisht kundër idesë së shtyrjes së zgjedhjeve.

Si mund të vendoset – ku është parë? – ky rregull i ri i bashkëjetesës demokratike, që zgjedhjet të varen nga dëshira ose mungesa e dëshirës së krimit të organizuar për zhvillimin e tyre, në datën e caktuar nga Kushtetuta. Kjo s’është punë date apo stine, kjo është punë qëndrueshmërie e themelit të jetës kriminale. Imagjinoni pak sikur të hapej rruga e një marrëzie të tillë jo vetëm qartësisht antikushtetuese, po edhe thelbësisht antidemokratike, se çfarë do të ndodhte në zgjedhjet pas këtyre zgjedhjeve, në ato pas tyre dhe me radhë, kur sipas tekave të krimit të organizuar data e zgjedhjeve të kthehej, nga një detyrim kushtetues për ata që duan të zgjidhen, në një lojë politike e krimit të organizuar!

Disa mendje ndër ato të lehtat që lartpërmenda i bien shkurt: Po ik ti (dmth Ju) e pastaj le të bëhen bashkë, andej nga vjeshta, zgjedhjet vendore e ato të përgjithshme dhe fitoji prapë po deshe, se po vazhduam kështu vendi do shkojë në përplasje civile! Kjo është një recetë nga ato që heqin dhimbjen e kokës duke e paralizuar komplet trupin e krimit të organizuar! Unë e imagjinoj çfarë rruge e tatëpjetë hapet për Ju nesër, nëse sot vendos krimi i organziuar, dhe kërcënon të ikësh nga parlamenti, të ushtrosh dhunë e të kërcënosh me lejimin e zgjedhjeve lokale dhe e përmbysin, mu në mes të mandatit qeverinë e zgjedhur, duke provokuar zgjedhje të reja kur do krimi i organizuar, madje me kryeministrin që vendos krimi i organizuar! Nuk është e nevojshme besoj të zgjatem në këtë pikë, sepse s’ka mendje normale që s’e kupton çfarë çorapi do të ishte një jetë e tillë politike, ku fituesi nuk qeveris dot sipas kontratës me popullin dhe humbësi i imponohet me dhunë edhe vetë popullit nga krimi i organizuar!

Shkurt, çdo zgjidhje anormale në emër të krimit të organizuar sot, kthehet në bumerang që prodhon anormalitet antidemokratik, për vite me radhë nesër.

Edhe dy fjalë për prodhimin dhe numërimin e votave nga krimi i organizuar! Gjithashtu është krim dhe ndëshkohet rëndë me Kodin Penal të Republikës së Shqipërisë, jo vetëm Avdylajt, Dako, Niçja apo Çimi, që  e kryen një krim të tillë. Cilido që do të kuturisej të prekte një hallkë të vetme të procesit zgjedhor dhe do të dënohej më pas për krime zgjedhore në Shqipëri, nuk e di nëse do ta kishte më të mundur të shkelte për gjithë jetën në Shtetet e Bashkuara (do të merrte në qafë edhe familjarët e afërt sipas ligjit përkatës në SHBA) dhe as do të kalonte dot më, kontrollin e kufijve të Bashkimit Europian duke u përfshirë në listën e kompjuterizuar të personave me rekorde kriminale, të cilët nuk hyjnë dot në territorin e Unionit. Pyeti të lutem, dhe thuaj vëllait tënd Dako se ai flet me kriminelët në telefon.

A i’a vlejnë të gjitha këto pasoja të rënda për të shkuar pas berihait? Ju nuk besoni po as Unë dhe jam i bindur se nuk do të ketë njerëz të zakonshëm, që të bëhen pjesë e një marrëzie kaq të jashtëzakonshme.

Në 30 qershor do të votohet në të 61 bashkitë e vendit. Ju u zotuat se do të bëni më të mirën për t’i dhënë Kukësit, Shkodrës, Kamzës, Lezhës, Devollit, Mallakastrës e me radhë bashkive blu, qeverisjen e munguar deri më sot, pavarësisht nëse do të dal apo jo opozita në votime. Kudo ku do të fitojmë, thoni Ju, aty ku keni kundërshtarë të regjistruar, njësoj si aty ku s’keni të tillë, Ju do të jeni në dispozicion të të gjithë qytetarëve pa dallim. Këtë e kuptuam dje dhe tashmë e kemi të qartë, si bashkëqytetarët tuaj demokratë edhe të tjerët që nuk dalin në zgjedhje fare. 

Betejën politike me krimin Ju nuk keni pas arsye ta fitoni, sa për meritën tuaj aq edhe të krimit të organizuar, ndajeni vetë cila nga të dyja peshon më shumë meqë jeni në Aleancë. Por betejën e vërtetë, më të vështirën, Ju e keni me plagët e qyteteve e të fshatrave kudo në Shqipëri, po sidomos aty ku ende era hashash të madh urban të gjashtë viteve të fundit kutërbon, ka fryrë sa e si duhet si pasojë e menaxhimit të mirë të mbjelljes dhe shitjes së hashashit me ndihmën shtetërore.

Me respekt të plotë për të drejtën tuaj për të menduar ndryshe prej meje, ju përshëndes e ju uroj çdo të mirë e shëndet në familjet tuaja.

Agim Popoci

6 qershor, 2019

P.S. Për korrektesë ndaj autorit dhe kujtesë për lexuesin, kjo është letra origjinale e shkruar nga Kryeministri Edi Rama: LETËR E SHTATË PUBLIKE JO PËR LULZIM BASHËN