Lëvizja Studentore ’90, darkë bamirësie për qytetarët e prekur nga tërmeti

Përfaqësia e Lëvizjes Studentore ’90, u mblodh më 8 Dhjetor në një darkë përkujtimore dhe bamirësie në ndihmë të qytetarëve të dëmtuar nga tërmeti i 26 Nëntorit.

Fjalën e hapjes së kësaj darke e mbajti Spiro Cura, i cili uroi pjesëmarrësit për Ditën e Pluralizmit dhe festën e rinisë duke kërkuar të mbahet 1 min heshtje për të gjithë ish-studentët e vrarë dhe ndarë nga jeta. Gjithashtu u përshëndeten ish-studentët në Shqipëri dhe Diasporë.

Ky takim mori në parim një nisëm të rëndësishme për krijimin e Komisionit të Lëvizjes Studentore ’90, për vitin jubilar të 30 vjetorit të Lëvizjes me objektiv ngritjen e Memorialit të Vlerave dhe Kontributeve të kësaj Lëvizje. Kjo do të realizohet me kontributin e gjithë ish-studentëve, duke strukturuar me anëtarësim gjithë prezencën e tyre.

Diskutim konstruktiv u bë edhe për hapjen e zyrave të Lëvizjes Studentore ’90, për të bërë të mundur krijimin dhe evoluimin e një rrjeti në funksion të objektivave të kësaj Lëvizje.

Në fund të pranishmit mblodhën një fond për ti ardhur në ndihmë familjeve të dëmtuara nga tërmeti.