Lëvizja Vetëvendosje kërkoi marrëveshje politike, kryesuesi ndërpret seancën – vazhdon të mërkurën

Në vazhdim të seancës konstituive sot deputeti i Lëvizjes Vetëvendosje, Glauk Konjufca, ka kërkuar marrëveshje politike për zgjidhjen e ngërçit të zgjedhjes së Kryetarit dhe të Nënkryetarëve të Parlamentit të Kosovës, gjë që nuk ndryshoi rrjedhën e sancës nga ajo paraprake.

“Lëvizja Vetëvendosje padyshim që e ka emrin e njëjtë. Është Albulena Haxhiu si e propozuar, por ne meqenëse e kemi parë se të gjitha subjektet politike qysh dje janë prononcuar se do ta kishin qëndrimin e njëjtë, mendoj se kjo situatë nuk mund të zgjidhet ndryshe veçse me një marrëveshje politike.

Ashtu siç votohen nënkryetarët e Kuvendit, atë koncept do të duhej ta kishte edhe kryetari i Kuvendit. Pa krijimin e një mazhorance, nuk mund të themelohet vet Kuvendi. Sikur ne ta kishim shumicën, do të mund t’i bllokonim nënkryetarët, a është kjo e arsyeshme? Atëherë ne kërkojmë një kohë shtesë që të mos përsëritet situata e njëjtë, të cilën e patëm tri herë radhazi,” tha Glauk Konjufca nga Lëvizja Vetëvendosje.

Pas këtij propozimi të Glauk Konjufcës, kryesuesi i Parlamentit, Avni Dehari e ndërpreu seancën konstituive, derisa paralajmëroi se vazhdimi i seancës do të ndodhë të mërkurën në orën 10:00.

Me ndërprerjen e seancës, opozita nxitoi të akuzoi Albin Kurtin ndërsa Lëvizja Vetëvendosje të jap leksione demokracie, por seanca konstituive ende nuk ka përfunduar dhe ata që i besuan votën këtyre 120 deputetëve thelluan zhgënjimin për besimin e dhënë!