Lezhë-Shkodër nën pushtimin e ujit, ministri Peleshi: Para 10 viteve…

Reshjet e dendura të shiut kanë sjellë probleme të shumta në akse të ndryshme rrugore ndërsa kanë mbetur nën pushtimin e ujit mijëra hektarë tokë bujqësore por kjo nuk e shqetëson Ministrin e Bujqësisë, Niko Peleshi i cili ngushëllohet pasi situata është shumë më e mirë se para 10 viteve ku prurjet ishin sa gjysma e prurjeve të sotme. Ndërsa vizitoi Kallmetin e Lezhës dhe Obotin e Shkodrës, Ministri tha se do të bëjnë të pamundurën për të evituar përmbytjen në Shkodër e në fushën e Bushatit.

“Kam marrë një informacion që këtu në Obot, pra ana e malit, njësia administrative e anës së malit, sa i përket sipërfaqes nuk kemi tërheqje të ujërave sepse e tillë është natyra. Ju e dini jemi në një sipërfaqe nën nivel, por është pozitive që kemi një ulje të lehtë të nivelit disa centimetra dhe era që po fryn po e përshpejton çuarjen e ujërave drejt detit.

Kemi gjithashtu një pozitivitet tjetër përsa i përket reshjeve, siç e shikoni nuk ka reshje në të gjithë vendin. Kjo ka bërë që në situatën në Lezhë siç e komunikuam dhe më parë të jetë shumë e përmirësuar, por këtu do të shkojë disi më ngadalë drejt përmirësimit.

E rëndësishme është që të mos kemi përmbytje në Shkodër, në fushën e Bushatit dhe gjasat janë që do të arrijmë ta evitojmë për shkak se pavarësisht se reshjet do të shtohen sot pasdite, nesër dhe sidomos pasnesër në datën 11.” tha Niko Peleshi duke bërë të ditur se ka komunikuar edhe me Drejtorin e KESH-it dhe me Ministren e Infrastrukturës dhe Energjisë për menaxhimin e kaskadë.

Por pak metra nga vendi ku ishte ministri Peleshi në fshatin Kallmet dhe Merqi, uji është tërhequr por situata mbetet problematike në Zadrimë të Lezhës. 2500 hektarë tokë bujqësore janë nën ujë ndërsa janë të pakalueshme akset rrugore që lidhin Blinishtin e Pirajt me superstradën Lezhë-Shkodër.

Rruga që lidh fshatrat e njësisë administrative Ugrej me Kallmetin në Lezhës ka pësuar rrëshqitje masive në një gjatësi prej disa metrash e për pasojë zona është e izoluar totalisht. Ndërkohë probleme ka edhe në akset rrugore që lidhin Blinishtin e Pirant me superstradën Lezhë Shkodër, ku uji arrin disa cm lartësi e për pasojë lëvizja është gati e pamundur.

Nga Torovica për të cilën rrugë Kryeministri i Niko Peleshit thuri lavde, ai sot është bllokuar ndërsa në ditën e pikut të reshjeve, 11 Janar banorët e zonës kanë ngelur vetëm me Zotin, pavarësisht se çfarë thotë Rama e Peleshi.

Ndërkohë në zonën e nënshkodrës, jo para 10 viteve por sot, sipas një raportimi të orës 08:00 të mëngjesit të sotëm, Bashkia Shkodër informon se janë 1.585 ha tokë të përmbytura,

Sot nuk ka reshje shiu ndërsa kreu i OSHEE-së pritet të jetë në kaskadën e Drinit për të parë nga afër situatën.

Në njësinë administrative Ana e Malit vazhdon të jetë e bllokuar rruga për në Obot për mjetet e ulëta.

Rruga e Obotit është e kalushme vetëm  me mjete të larta. Niveli i ujit mbi rrugë arrin mbi 50cm.

Ujesjellesi Oblika 1 si pasojë e përmbytjeve është jashtë funksionit por UKSH ka furnizuar me uje te pijshëm banore të fshatit Oblikë.

Sipërfaqja e tokës bujqësore e përmbytur vlerësohet në 850 Ha, kryesisht ne fshatrat Obot, Muriqan,Oblikë

Në Dajç sipërfaqja e tokës bujqësore e përmbytur vlerësohet në 610 Ha, kryesisht në zonën e quajtur “Këneta e Dajçit” (fshatrat  Dajç,Mushan,Shirq,Suka-Dajç,Pentar), nga të cilat : Tokë e pakultivuar  245 Ha

Në Njësinë administrative Guri i Zi sipërfaqja e tokës bujqësore e përmbytur vlerësohet në 5 Ha, kryesisht në fshatin Rrenc.

Në Velipojë sipërfaqja e tokës bujqësore e përmbytur vlerësohet në 30 Ha, kryesisht në fshatrat Ças,Reç (këneta Reçit),Baks i Ri.

Në Bërdicë sipërfaqja e tokës bujqësore e përmbytur vlerësohet në 100 Ha, kryesisht ne fshatin Trush (fusha e stomes), e Bërdicë e Madhe. Ndërsa vazhdon gerrryerja e tokës bujqësore nga lumi Drin në vendin e quajtur Harku i Bërdicës, fshati Bërdicë e Sipërme.

Vazhdon gerrryerja e tokës bujqësore nga lumi Kir në vendin e quajtur Bardhaj, fshati Bardhaj.

Gjithashtu ka rritje të nivelit të ujit nga Liqeni i Shkodrës, në zonën e Livadeve dhe Dobraç

Vazhdon gerrryerja e tokës bujqësore nga lumi Kir në vendin e quajtur Bardhaj, fshati Bardhaj. Gjithashtu ka rritje të nivelit të ujit nga Liqeni i Shkodrës, në zonën e Livadeve dhe Dobraç

Bashkia kërkohet tu vihet në dispozicion banorëve të Obotit një varkë dhe një makinë ushtrie.